Kukwe kira 90

Meri ben ñö okwä känti

JESÚS namani ja düke Samaria ñö okwä känti. Nitre nänkä ben nikani jutate mrö kökö jai. Meri ben Jesús tä blite ye jatani ñö den jai. Niarakwe niebare ie: ‘Ñö ngwen tie.’

Ye käkwe meri ye ngwani töbike krubäte. ¿Ñobätä gare mäi? Jesús ye ni Judío aune meri ye abokän Samaria. Aune nitre Judío ye jökrä bäsi ja rüere nitre Samaria ben. ¡Ñaka blite jire ben! Akwa Jesús abokän nitre jökrä tarere. Niara niebare ie: ‘Nire tä ñö kärere mäi ye rabadre gare mäi akrä, mäkwe ñö kärädre ie, aune niarakwe ñö ja nirekrä ye biandre mäi.’

Meri käkwe niebare, ‘Dänkien, ñö mente nguse aune jondron ñaka diandre mäi. ¿Ñö ja nirekrä ye kwandi medente mäi?’

‘Mäkwe ñö ne ñai angwane, tomana rabaita mäi,’ niebare Jesukwe. ‘Akwa ñö biandi tikwe ye raba ni mike nüne kärekäre.’

Meri käkwe niebare, ‘Dänkien, ¡ñö ye bien tie! Aune tomana ñaka rabai jire tie. Aune ti ñaka jatadreta jire ñö ne den jai.’

Jesús nämene blite ñö metre yebätä namani ruin meri ye ie. Akwa Jesús nämene blite kukwe metre Ngöbökwe aune gobran kwe yebätä, abokän bämikata ñö ja nirekrä ye kwrere. Raba ja nire käre ye bien nie.

Jesús niebare meri ye ie mada: ‘Nän aune mäkwe mä muko ye kärä biti mä jatata nete.’

‘Ti muko ñaka,’ niebare kwe.

‘Mä kukwe metre nini,’ niebare Jesukwe. ‘Mä muko namanina nirike, akwa ni mada tä nüne mäbe ye abokän ñaka mä muko.’

Meri ye nikaninkä, ñobätä ñan aune Jesús kukwe metre niebare. ¿Ñokänti kukwe jökrä ye nämene gare ie? Ñobätä ñan aune, Jesús ye meden Ngöbökwe Käbämikani, Ngöbökwe juani bätä kukwe ye mikani gare kwe ie. Nitre nänkä ben ye nükaninta angwane, töi ñan namani krütare Jesús nämene blite meri Samaria ben yebätä.

¿Kukwe ne kätä dre mike gare nie? Jesús ye töi kwin ni jökrä kräke. Nikwe ja ngwandre ye erere arato; nitre kwata o kukwe bä jene yebätä töi käme ni ñaka rabadre nütüre. Nitre jökrä ie kukwe metre ja nirekrä ye rabadre gare ie Jesús tö. Aune nikwe ja töi mikadre ni mada dimike kukwe ye mike gare jai.

Juan 4:5-43; 17:3.