Jesus nomukazendu pondjombo
EHUNGI 90
Jesus nomukazendu pondjombo
JESUS wa kasuva pondjombo mu Samaria. Ovahongewa ve va ya kotjihuro okukaranda ovikurya. Omukazendu ngu ma hungire kuna Jesus we yekuteka omeva. Eye wa hungira komukazendu na tja: ‘Ndji pa omeva mbi nwe.’
Ihi tja temisa omukazendu tjinene. Ove mo tjiwa kutja omena ratjike? Omena rokutja Jesus wa ri Omujuda, nomukazendu wa ri Omusamaria. Nu Ovajuda ovengi kaave vanga Ovasamaria. Owo nandarire kaave ve hungirisa! Nungwari Jesus wa suverere ovandu avehe kangamwa. Okutja eye wa tja: ‘Andakuzu ove ootjiwa kutja ouṋe ngwe ku ningire omeva okunwa, ove otjo mu ningira, neye etje ku pa omeva omanamuinyo.’
Omukazendu wa tja ku ye: ‘Muhona, ondjombo ongoto, nOve ko notjiwote. Nambano omeva omanamuinyo mo isa pi?’
Jesus we mu kahururira na tja: ‘Ove tji wa nu omeva okuza mondjombo ndji ove mo ṱonyota rukwao. Nungwari omeva ami ngu me yandja ye yandja omuinyo waaruhe.’
Omukazendu arire tja tja: ‘Muhona ndji pao omeva ngo! Kutja e ha ṱonyota rukwao. Nu hi mee hepa okuya mba okuteka omeva rukwao.’
Omukazendu ee ripura kutja Jesus ma hungire ohunga nomeva oyeniyeni. Nungwari eye aa heye ouatjiri ohunga na Mukuru nouhona we. Ouatjiri mbwi u ri tjimuna omeva omanamuinyo. Owo mau yenene okuyandja omuinyo waaruhe komundu.
Jesus nambano wa raera komukazendu na tja: ‘Twende u kaisane omurumendu woye, nu u kotoke.’
Eye we mu zira na tja: ‘Ami hi nomurumendu.’
Jesus arire tja tja: ‘Ove wa ziri nawa. Nungwari ove wa kupirwe i ovarumendu vetano nu ingwi ngu mu ri pamwe nambano eye kamurumendu woye.’
Omukazendu wa temenwe, mena rokutja oviṋa avihe mbi vya ri ouatjiri. Jesus aa tjiwa vi oviṋa avihe mbi? Omena rokutja Jesus eye Omukwizikwa ngwa hindwa i Mukuru, nu Mukuru ongwe mu pa ondjiviro ndji. Moruveze ndo ovahongewa vaJesus va kotoka, nowo va temenwe indu tji va muna Jesus ama hungire ku nomukazendu Omusamaria.
Eṱe matu rihongere ko tjike ku avihe mbi? Ovyo mavi tu raisire kutja Jesus u tjinda ovandu vomihoko avihe nawa. Neṱe wina tu sokukara nao. Eṱe katu sokuripura kutja ovandu tjiva ovavi mena rokutja ovomihoko vyorive mbyo. Jesus u vanga kutja ovandu avehe ve tjiwe ouatjiri mbu twara komuinyo waaruhe. Neṱe wina matu sokukara nonḓero yokuvatera ovandu okurihonga ouatjiri.
