YESU gaw Samari mung na hka htung langai mi a makau e, hkring sa nga ai. Shi a sape ni gaw lusha mari na matu mare de sa wa ma ai. Yesu hte ga shaga nga ai numsha gaw hka ja na matu sa wa ai. Yesu gaw numsha hpe ‘Ngai hpe ntsin jaw lu e,’ nga ai.

Shing nga tsun ai hpe numsha gaw grai mau mat ai. Hpa majaw re ai hpe chye a ni? Yesu gaw Yuda masha rai nna shi gaw Samari masha langai mi rai nga ai majaw re. Yuda masha ni law malawng Samari masha ni hpe n ra ma ai. Shanhte hpe aga pyi n shaga hkat ma ai. Raitimung Yesu gaw masha amyu baw shagu hpe tsaw ra ai. Dai majaw: ‘Ntsin hpyi lu ai wa gaw kadai re ai hpe nang chye taw gaw nang shi kaw hpyi na re. Shi mung nang hpe asak ntsin jaw lu na re’ nga nna tsun ai.

Dai numsha gaw, ‘Sara e hka htung mung sung nga ai. Sara kaw hka pung mung nnga ai. Asak ntsin kanang na lu na kun?’ nga ai.

Yesu gaw: ‘Ndai hka htung na ntsin hpe lu yang bai hpang gara na ra ai. Raitimung ngai jaw ai ntsin hpe lu ai wa gaw htani htana asak hkrung na ra ai,’ nga nna Yesu tsun dan ai.

‘Sara e, ngai hpe dai ntsin jaw rit. Ngai galoi mung ntsin hpang gara na nrai sai. Ndai yang e mung hka ja n sa ra na sai.’

Dai numsha gaw ntsin majing hte seng nna Yesu tsun nga ai zawn nawn ai. Raitimung Yesu gaw, Karai Kasang hte seng ai teng man ai tara hte, shi a mungdan lam hpe tsun nga ai. Dai teng man ai tara gaw asak ntsin hte bung nga ai. Masha langai mi hpe htani htana asak jaw lu ai.

Yesu gaw: ‘Na a madu wa hpe shaga sa wa rit,’ nga nna tsun ai.

‘Ngai la nlu nngai,’ nga nna numsha gaw bai htan ai.

‘Nang tsun ai ga gaw teng ai. Raitimung nang la manga lu yu nit dai; Ya nang hte nga ai la gaw na a la nre,’ nga nna Yesu bai tsun ai.

Dai numsha gaw mau mat ai. Ndai lam yawng teng nga ai. Ndai lam ni hpe Yesu kaning rai chye lu ai kun? Teng ai. Yesu gaw Karai Kasang shangun dat na nga nna ga sadi nga ai wa nan re. Yesu hpe Karai Kasang gaw ndai lam ni chye shangun ai. Dai aten e, Yesu a sape ni mare kaw na bai du wa ma ai. Yesu gaw Samari numsha hte aga shaga nga ai hpe shanhte wa mu nna mau ma ai.

Ndai lam ni hta na kaning re ai kasi ningli hpe chye la lu a ni? Yesu gaw masha amyu baw shagu a ntsa e, myit kaja tawn ai, lam hpe chye lu ai. Anhte mung shing rai galaw yang kaja ai. Dai baw amyu re ai majaw nkaja ai ngu nna anhte nmai myit la ai. Htani htana asak lam de madun sa wa ai teng man ai tara hpe masha yawng hpe chye na shangun mayu ai myit Yesu hta rawng ai. Masha ni hpe teng man ai tara chye na lu hkra karum mayu ai myit anhte hta mung rawng ra ai.