Ngewa ya 90: E na Ũla Mũndũ Mũka Kĩthimanĩ
YESŨ nĩwathũmũĩte ũtee wa kĩthima kũya Samalia. Amanyĩw’a make maĩ manathi ndũanĩ kũũa lĩu. Mũndũ mũka ũũ Yesũ ũkũneena nake ooka kũuta kĩw’ũ. Na Yesũ emwĩa: ‘Nenga kĩw’ũ nĩnyw’e.’
Ũu nĩwaseng’isye mũndũ mũka ũsu mũno. We nĩwĩsĩ nĩkĩ? Kĩtumi nũndũ Yesũ nĩ Mũyuti nake nĩ Mũsamalia. Ayuti aingĩ mayendete Asamalia. O na mayaneenanasya namo! Ĩndĩ Yesũ endete andũ ma mĩthemba yonthe. Kwoou amwĩa: ‘Kethĩwa nĩwĩsĩ ũla ũnũũkwĩa ũmũnenge kĩw’ũ anyw’e, wĩthĩwa wamwĩtya nake ethĩwa akũnenga kĩw’ũ kya thayũ.’
Mũndũ mũka ũsu amwĩa, ‘Mwĩaĩi, kĩthima nĩ kĩliku, naku o na ndwĩna ndoo. Kĩw’ũ kyu kya thayũ wĩumya va?’
Nake Yesũ amwĩa: ‘Kethĩwa ũkanyw’a kĩw’ũ kya kĩthima kĩĩ ũkeew’a waũnĩ ĩngĩ. Ĩndĩ kĩw’ũ kĩla nĩnenganae nĩkĩtonya kũtuma mũndũ ekala tene na tene.’
Nake mũndũ mũka asya: ‘Mwĩaĩi, nenga kĩw’ũ kyu! Na ĩndĩ ndikew’a waũni ĩngĩ. Na ndikethĩwa na vata wa kũka vaa kũtava kĩw’ũ ĩngĩ.’
Mũndũ mũka ũsu asũanĩaa kana Yesũ eneena ĩũlũ wa kĩw’ũ kya w’o. Ĩndĩ we aneenaa ĩũlũ wa ũla w’o kwelekela Ngai na ũsũmbĩ wake. W’o ũsu nĩ ta kĩw’ũ kĩnenganae thayũ. Nũtonya kũnenga mũndũ thayũ ũtathela.
Nayu ĩndĩ Yesũ eea mũndũ mũka ũsu: ‘Enda ũkamwĩte mũemeu na ũisyoka.’
Nake asũngĩa: ‘Nyie ndi mũũme.’
Na Yesũ amwĩa: ‘Waneena w’o. Nũndũ aũme ala waĩ namo nĩ atano, na ũla wĩkalaa nake yu ti mũemeu.’
Mũndũ mũka ũsu nĩwaseng’ie nũndũ maũndũ asu onthe maĩ ma w’o. Yesũ amanyie maũndũ asu onthe ata? Amamanyie nũndũ we nĩ Ũla wathanĩtwe na watũmĩtwe nĩ Ngai. Ngai nĩwe wamũmanyĩthasya ũvoo ũsu w’onthe. O kavinda kau amanyĩw’a ma Yesũ masyoka, na maseng’a nũndũ nĩwanenaa na mũndũ mũka Mũsamalia.
Twĩĩmanyĩsya kyaũ kumana na ũu w’onthe? Ũu wĩonany’a kana Yesũ e ĩnee kwa andũ ma mbaĩ syonthe. Na now’o o naitũ twaĩlĩte kwĩthĩwa tũilyĩ. Tũyaĩlĩte kũsũanĩa kana andũ amwe nĩ athũku nũndũ nĩ ma mbaĩ ĩngĩ. Yesũ eenda andũ onthe mamanye w’o ũla ũtongoasya thayũnĩ ũtathela. Na o naitũ nĩtwaĩlĩtwe nĩkwenda kũtetheesya andũ memanyĩsye ũla w’o.
Yoana 4:5-43; 17:3.
Makũlyo
- Nĩkĩ Yesũ wathũmũĩle ũtee wa kĩthima kũya Samalia, nake amwĩie ata mũndũ mũka ũla waĩ vau?
- Ũ mũndũ mũka aseng’iwe nĩ kyaũ, nake Yesũ amwĩie ata, na nĩkĩ?
- Nĩ kĩw’ũ kya mũthemba mwaũ mũndũ mũka ũsu wasũanĩaa takyo Yesũ waneenaa ĩũlũ wakyo, ĩndĩ kwa w’o nĩ kĩw’ũ kĩva Yesũ waneenaa ĩũlũ wakyo?
- Nĩkĩ mũndũ mũka ũsu waseng’ie nũndũ wa maũndũ ala Yesũ weesĩ ĩũlũ wake, nake akwatie ũvoo ũsu ata?
- Nĩ ĩsomo yaũ tũtonya kwĩmanyĩsya kũmana na Ngewa ya mũndũ mũka ũsu waĩ kĩthimanĩ?
Makũlyo ma kwongeleela
- Soma Yoana 4:5-43.
Kwa kũatĩĩa ngelekany’o ya Yesũ twaĩlĩtwe kwĩthĩwa na woni mwaũ kwelekela andũ ma mbaĩ na ũko ũngĩ? (Yoa. 4:9; 1 Ako. 9:22; 1 Tim. 2:3, 4; Tito 2:11)
Nĩ moseo meva ma kĩveva ala mũndũ ũla watw’ĩka mũmanyĩw’a wa Yesũ ũkwataa? (Yoa. 4:14; Isa. 58:11; 2 Ako. 4:16)
Tũtonya ata kwonany’a weendesyo ta wa mũndũ mũka Mũsamalia, ũla waĩ na mea ma kũtavany’a maũndũ ala weemanyĩisye? (Yoa. 4:7, 28; Mt. 6:33; Lk. 10:40-42)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Yesũ Nĩwamanyĩisye Mũndũ Mũka Mũsamalia
Yesũ nĩwamũtavisye mũndũ mũka Mũsamalia ũndũ ũtonya kwĩthĩwa atatavĩtye mũndũ ũngĩ ũtheinĩ.
