YESU waikajile ku mushima wa mu Samaliya amba akokolokepo. Baana banji ba bwanga bayile mu muzhi na kupota kajo. Mwanamukazhi ye aambilenga nanji Yesu waishile na kutapula mema. Wamwambijile’mba: ‘Mpepo mema ntome.’

Kino kyakumishe bingi mwanamukazhi. Nanchi wayuka ene mambo nyi? Ke na mambo a kuba’mba Yesu wajinga Muyudea, kabiji mwanamukazhi wajinga mwina Samaliya. Kabiji Bayudea bavula kechi batemenwe bena Samaliya ne. Kechi besambanga nangwa kwisambatu ne! Bino Yesu watemenwe bantu bonsetu. Onkao mambo, waambile’mba: ‘Umvwe waji kumuyuka awa ubakulombenga mema, inge waji kumwipuzha, kabiji ne aye inge waji kukupa mema a bumi.’

Mwanamukazhi waambile’mba: ‘Mwane, kechi muji na kya kutapulako ne, ne mushima naye wazhika: Nanchi ao mema a bumi musa kwiafumya pi?’

Yesu walumbulwile’mba: ‘Bonse batoma ano mema bakomvwa kilaka jibiji: pakuba awa ukatoma mema o nkamupa amiwa, kechi ukomvwa kilaka myaka ne myaka ne.’

Mwanamukazhi waambile’mba: ‘Mwane, mpai oo mema ntome! Kepo nkabule kwikyumvwa kilaka jibiji. Kabiji nkabule kwiya jibiji kuno na kutapula mema.’

Awa mwanamukazhi walangulukilenga’mba Yesu waambilenga pa mema onkae. Bino aye waambilenga pa bukine bwa kuyuka Lesa ne bufumu bwanji. Buno bukine buji nobe mema apana bumi. Bwakonsha kulengela muntu kwikala myaka ne myaka.

Kepo Yesu aambijile mwanamukazhi amba: “Kete mwata obe, wiye nanji kuno.”

Mwanamukazhi wakumbwile’mba: “Kechi nji na mulume ne.”

Yesu waambile’mba: ‘Waamba bulongo. Bino waikajile nabo banabalume batanu kabiji ne yewo ye uji nanji kechi mwata obe ne.’

Mwanamukazhi wakuminye bingi mambo byonse bino byajinga bya kine. Yesu wayukile byepi bino bintu? Ee, wayukile na mambo a kuba’mba Yesu wajinga Muntu Walayiwe, ye batumine kwi Lesa, kabiji Lesa wamubujile bino bintu. Pa kino kimye, baana ba bwanga ba kwa Yesu saka babwela kala, kabiji nabo bakuminye bingi pa byo esambilenga na mwanamukazhi mwina Samaliya.

Ki ka kyo tufunjilako ku bino byonse? Kimwesha’mba Yesu ubila lusa bantu ba mitundu yonse. Kabiji ne atweba byo byo twafwainwa kubanga. Kechi twafwainwa kulanguluka’mba bantu bamo batama na mambotu a kuba’mba ba mutundu ungi ne. Yesu ukeba bantu bonse kuyuka bukine butwala ku bumi bwa myaka. Ne atweba twafwainwa kukwasha bantu kufunda bukine.