ပူ ၉၀
ထံၣ်လိာ်အသးဒီး ပိာ်မုၣ်တဂၤလၢ ထံပူၤကပၤ အဂ့ၢ်
ယ့ၣ်ၡူးန့ၣ် အိၣ်ဘှံးဝဲဒၣ်လၢ ထံပူၤတပူၤအကပၤ လၢအအိၣ်လၢကီၢ်ၡၤမရံန့ၣ်လီၤ. အပျဲၢ်တဖၣ်လဲၤဆူဝ့ၢ်ပူၤဒီး လဲၤပှ့ၤတၢ်အီၣ်တၢ်အီန့ၣ်လီၤ. ပိာ်မုၣ်လၢကတိၤတၢ်ဒီးယ့ၣ်ၡူးန့ၣ် ဟဲဒ်သိးကဒၢၣ်ထံန့ၣ်လီၤ. ယ့ၣ်ၡူးစံးဘၣ်အီၤ ‘ဟ့ၣ်ယၤထံလၢယကအီတက့ၢ်.’
ပိာ်မုၣ်န့ၣ် ကမၢကမၣ်ဘၣ်အသးဒိၣ်မးလၢ ယ့ၣ်ၡူးတဲအီၤဒ်န့ၣ်အဃိလီၤ. ဘၣ်မနုၤအဃိလဲၣ်န့ၣ်သုသ့ၣ်ညါဧါ. ယ့ၣ်ၡူးမ့ၢ်ပှၤယူဒၤဖိဒီး ပိာ်မုၣ်တခီ မ့ၢ်ပှၤၡၤမရံမုၣ်အဃိလီၤ. ပှၤယူဒၤဖိတဖၣ်န့ၣ် တဘၣ်အသးလၢ ပှၤၡၤမရံဖိတဖၣ်ဘၣ်. တကတိၤဃုာ်တၢ်ဒီးအဝဲသ့ၣ်ဘၣ်. ဘၣ်ဆၣ် ယ့ၣ်ၡူးတခီ အဲၣ်ပှၤခဲလၢာ်န့ၣ်လီၤ. လၢတၢ်အံၤအဃိ စံးဝဲဒၣ်ပိာ်မုၣ်အံၤလၢ ‘နမ့ၢ်သ့ၣ်ညါ ပှၤလၢဃ့အီနၤထံအံၤ မ့ၢ်မတၤလဲၣ်န့ၣ် နကဃ့အီၤဒီး အဝဲကဟ့ၣ်နၤ သးအထံမူန့ၣ်လီၤ.’
ပိာ်မုၣ်အံၤစံးဝဲဒၣ် ‘သရၣ်ဧၢ, ထံပူၤယိာ်နးမး, ဒီးလၢနအိၣ် ထံစဲၤတအိၣ်ဘၣ်အဃိ နကလဲၤမၤန့ၢ် သးအထံမူဖဲလဲၣ်.’ န့ၣ်လီၤ.
ယ့ၣ်ၡူးစံးဘၣ်အီၤ ‘နမ့ၢ်အီ ထံပူၤအံၤအထံန့ၣ် တၢ်ကသူကဒီးနၤလၢထံလီၤ. သနာ်က့ ပှၤလၢအအီထံလၢယဟ့ၣ်အီၤန့ၣ် မူဝဲလီၤထူလီၤယိာ်သ့လီၤ.’
ပိာ်မုၣ်စံးဝဲ ‘သရၣ်ဧၢ, ဟ့ၣ်ယၤထံဝဲန့ၣ်တက့ၢ်, မ့ၢ်ဟ့ၣ်ယၤန့ၣ် တမ့ၢ်တၢ်ကသူယသးထံလၢၤဘၣ်. ယဟဲဒၢၣ်ထံဖဲအံၤစ့ၢ်ကီး တမ့ၢ်ကလိၣ်လၢၤဘၣ်’ န့ၣ်လီၤ.
ပိာ်မုၣ်န့ၣ် ဆိကမိၣ်ဝဲလၢ ယ့ၣ်ၡူးစံးဘၣ်အီၤထံနီၢ်နီၢ် န့ၣ်လီၤ. နီၢ်နီၢ်တခီ ယ့ၣ်ၡူးကတိၤဝဲ တၢ်မ့ၢ်တၢ်တီ ဘၣ်ဃးကစၢ်ယွၤ ဒီးအဘီအမုၢ်အဂ့ၢ်န့ၣ်လီၤ. တၢ်မ့ၢ်တၢ်တီအံၤန့ၣ် လီၤဂာ်လၢသးအထံမူန့ၣ်လီၤ. ဟ့ၣ်ပှၤတဂၤတၢ်မူအထူအယိာ်သ့န့ၣ်လီၤ.
ယ့ၣ်ၡူးတဲအီၤ ‘လဲၤကိးနဝၤတက့ၢ်.’
ပိာ်မုၣ်န့ၣ်စံးဆၢအီၤ ‘ယဝၤတအိၣ်ဘၣ်.’
ယ့ၣ်ၡူးစံးဆၢက့ၤအီၤ ‘နစံးတၢ်န့ၣ်မ့ၢ်ဝဲလီၤ. ဘၣ်ဆၣ် နဝၤအိၣ်လံယဲၢ်ဂၤလံ. ပိာ်ခွါလၢအအိၣ်ဒီးနၤခဲအံၤန့ၣ် တမ့ၢ်နဝၤဘၣ်’ န့ၣ်လီၤ.
ယ့ၣ်ၡူးစံးတၢ်မ့ၢ်ခဲလၢာ်အဃိ ပိာ်မုၣ်န့ၣ် ကမၢကမၣ်ဝဲဒိၣ်မးန့ၣ်လီၤ. ယ့ၣ်ၡူးသ့ၣ်ညါ တၢ်ဂ့ၢ်တဖၣ်န့ၣ်ဒ်လဲၣ်. ယ့ၣ်ၡူးမ့ၢ်ပှၤလၢ ကစၢ်ယွၤစံးပာ်လၢအကဆှၢလီၤအီၤ အဃိန့ၣ်လီၤသၢၣ်. ယွၤဒုးသ့ၣ်ညါအီၤ လၢတၢ်ဂ့ၢ်တဖၣ်န့ၣ်လီၤ. ဖဲန့ၣ်အခါ ယ့ၣ်ၡူးအပျဲၢ်တဖၣ် ဟဲက့ၤတုၤဝဲသ့ၣ်ဒီး ထံၣ်ယ့ၣ်ၡူးကတိၤတၢ်လၢ ၡၤမရံမုၣ်တဂၤအဃိ ကမၢကမၣ်ဝဲတကုၤသ့ၣ်လီၤ.
ပသ့ၣ်ညါဘၣ်မနုၤ လၢတၢ်ဂ့ၢ်တဖၣ်အံၤန့ၣ်လဲၣ်. တၢ်ဂ့ၢ်အံၤ ပာ်ဖျါထီၣ် ယ့ၣ်ၡူးန့ၣ် အသးဂ့ၤလၢ ပှၤကိးကလုာ်ဒဲးအဖီခိၣ်လီၤ. ပဝဲစ့ၢ်ကီးပကြၢးကဲထီၣ်ဒ်န့ၣ်လီၤ. ပတကြၢးပာ်ပသးလၢ ပှၤတနီၤန့ၣ် မ့ၢ်ပှၤကလုာ်ဒ်အံၤဒ်နုၤအဃိ တဂ့ၤဝဲဘၣ်န့ၣ်ဘၣ်. ယ့ၣ်ၡူးအဲၣ်ဒိး ပှၤကိးဂၤဒဲး သ့ၣ်ညါတၢ်မ့ၢ်တၢ်တီလၢ အဆှၢပှၤဆူတၢ်မူအထူအယိာ် န့ၣ်လီၤ. ပဝဲသ့ၣ်တဖၣ်စ့ၢ်ကီး ပကြၢးသးအိၣ်မၤစၢၤပှၤတဖၣ် လၢကမၤန့ၢ်တၢ်မ့ၢ်တၢ်တီအဂီၢ်န့ၣ်လီၤ.