Esimwititi 90: Nomukadi pondjombo
JESUS kwa sikeme a pwizumuke pondjombo moSamaliya. Varongwa vendi kwa zire modoropa va ka rande nondya. Mukadi ogu ana kuuyunga nage Jesus kuna wiza a ya vhete mema. Jesus ta mu tantere asi: ‘Kwafeni nge ko mema ni nwe.’
Eyi tayi tetura mukadi ogu unene. Ono diva asi morwasinke? Morwa Jesus Mujuda, ano age Musamaliya. Vajuda wovanzi kapi va hara Vasamaliya. Nampili kuuyunga, nokuuyunga si nawo! Nye Jesus kwa hara vantu navenye. Makura ta tanta asi: ‘Ngano asi kuna diva ogu ana kumuhundira mema, ngano none muna mu hundire, ano age ngano ana mu pe mema gomwenyo.’
Mukadi ta tanta asi: ‘Tate, ndjombo nde, one hena kutupu sipako. Kupi nomu gwana gene mema gomwenyo?’
Jesus ta singonona asi: ‘Nsene o nwa mema gomondjombo ezi, ngo fa hena enota. Nye mema aga ani gava kuvhura kuninka muntu a paruke narunye.’
Mukadi ta tanta asi: ‘Tate, kwafeni nge nye mema ogo! Makura ame ngano kapi ngani fa hena enota. Ntani ngano kapisi hepero hena ngani wize oku ni ya vhete mema.’
Mukadi kuna kugazara asi Jesus kuna kuuyunga kuhamena mema-mema. Nye age kuna kuuyunga usili wokuhamena Karunga nouhompa wendi. Usili ou kwa fana ngwendi mema gomwenyo. Awo kuvhura kupa muntu mwenyo gwanarunye.
Jesus makura ta tantere mukadi asi: ‘Ka zeni mu ka zigide mugara gweni, mu ka wize oku.’
Age ta limburura asi: ‘Ame kapi na paka mugara.’
Jesus ta tanta asi: ‘Muna limburura nawa. Nye mwa kere novagara vatano, ntani mugara ogu muna hingire nage ngesi kapisi mugara gweni.’
Mukadi ta tetuka unene, morwa nayinye eyi kuna kara usili. Ngapi Jesus omu ana diva nayinye eyi? Yimo, morwa Jesus kwa kere Mutumbwidira ogu ga tumine Karunga, ntani Karunga yige ana mu pe mapukururo aga. Posiruwo esi varongwa vaJesus tava ka tengura, ano awo tava tetuka eyi va ya mu gwene age ta uyunga nomukadi goMusamaliya.
Yinke tuna kulirongera ko kwanayinye eyi? Ayo kuna kulikida asi Jesus kufira mbili vantu womarudi nagenye. Nose twa kona kukara ngoso. Kapi tatu gazara asi vantu vamwe vadona yeeyi tupu morwa awo worudi rongandi. Jesus kwa hara asi vantu navenye va dive usili ou au twara komwenyo gwanarunye. Nose twa kona kuhara kuvatera vantu va lironge usili.
Johanesa 4:5-43; 17:3.
Mapuro
- Morwasinke Jesus ana sikamene pondjombo moSamaliya, ntani opo yinke ana kuuyunga komukadi?
- Morwasinke ana tetukire mukadi, yinke ana kumutantera Jesus, ntani morwasinke?
- Mema musinke ana kugazara mukadi aga ana kuuyunga Jesus, nye mema musinke nawa-nawa ana tamba?
- Morwasinke ana tetukire mukadi kweyi ga diva Jesus kumuhamena, ntani ngapi omu ana yi diva eyi?
- Yirongwa musinke natu vhura kulirongera ko kosihorokwa somukadi pondjombo?
Mapuro gokugwederera ko
- Resa Johanesa 4:5-43.
Pokukwama sihonena saJesus, nkareso musinke twa hepa kulikida kovantu womarudi ndi wonontundiliro dokulisiga?
Mauwa musinke gopampepo aga wiza komuntu ogu a kara murongwa gwaJesus?
Ngapi omu natu vhura kulikida rupandu ngwendi rogwina mukadi goMusamaliya, ogu ga kere neharo lyokuligavera eyi ga lirongere?
