LUSANSU LWA 90
Yesu yo Nkento Vana Sima kia Maza
YESU wavwanda mu vunda vana sima kia maza kuna Samaria. Alongoki andi bele muna mbanza mu sumba madia. O nkento kemokenanga yandi o Yesu maza kezidi teka. Umvovese vo: ‘Umpana maza yanua.’
O nkento osivikidi kikilu. Nga ozeye ekuma? Ekuma kadi o Yesu Nyuda, oyandi Nsamaria. Ndonga muna Ayuda ke bazolanga Asamaria ko. Ke bavovananga nkutu ko. Kansi, o Yesu wazolanga wantu a mpila zawonso. Yesu umvovese vo: ‘Ovo ozeye ndiona ulombele maza, nga unlombele, kavana maza mamoyo.’
O nkento umvovese vo: “E Mfumu, kuna ya tekwa ko, e sima kiansini: akweyi metuka maza momo mamoyo?”
O Yesu umvutwidi vo: ‘Ovo onuini maza mama, omona diaka evwina: Kansi maza mana mvana mezingisa muntu yamu mvu ya mvu.’
O nkento umvovese vo, ‘E Mfumu, umpana maza momo, kiamona diaka evwina, ngatu kwiza kwaku yateka mo.’
O nkento wabanza vo o Yesu maza kikilu kayikanga. Kansi, ludi mu kuma kia Nzambi ye kintinu kiandi kayikanga. E ludi kiaki kina nze maza mevananga moyo. Kilenda vana moyo wa mvu ya mvu kwa muntu.
O Yesu ovovese nkento vo: ‘Wenda bokela nkaz’aku, wiza vutuki.’
O nkento umvutwidi vo: ‘Kina ye yakala ko.’
O Yesu umvovese vo: “Otomene vova kiambote kadi akazi aku tanu wakala yau; ndiona wina yandi wau, ke nkaz’aku ko.”
O nkento osivikidi kadi mana kamvovesa maludi. Aweyi kazayila mambu mama o Yesu? Wazaya mo kadi yandi i ndiona wasilwa o Nsilu kwa Nzambi, Nzambi wanzayisa mambu mama. Vana vau alongoki andi balueke. Basivikidi wau kemokenanga yo nkento a Nsamaria.
Ameyi tulongokele muna mawonso mama? Disongele vo o Yesu wazolanga wantu a makanda mawonso. I wau mpe tufwete kala oyeto. Ka tufwete yindulanga ko vo o muntu wambi wau vo mwisi kanda diakaka. Yesu wazola vo wantu awonso bazaya e ludi kifilanga ku moyo a mvu ya mvu. Oyeto mpe tufwete sadisa wantu bazaya e ludi.