Oku Samariaru ri be Yi A’di ma Tia
A’DIKO 90
Oku Samariaru ri be Yi A’di ma Tia
YESU nga pa so ava lizu yi a’di samaria ri ma tia. Isu deresi ’ba eri ma vuti ’bipi ’diyi muki nyaka je ria sua. Oku Yesu ni e’yo nzezu eri be ’da i emu yi eberia. Yesu nga ’yo eri tia kini: ‘Mi fe mani yi mvuzaru.’
Oku nde eca osuta si. Mini a’du e’yo si’ari ra ya? A’dusikuni Yesu ni Yahudio ni dika oku ndeni Samario ni. ’Ba Yahudi ni ’diyi leni ’ba Samaria ’diyi ku. Nzeki vini eyo eyi ma eselea ku indi! Te Yesu le ’ba dria. Nga di ’yo kini: ‘Mi ka te agu yi a’ipi mi vu ’di nira, mi ta nga ’yo ma fe mini yi idrini.’
Oku nga ’yo kini: ‘Opi, afa mi dri yi ekozuni yo, yi a’di nde di ovu vini bule ali rua. Mi di nga yi idri ni ri isu ngoa ya?’
Yesu nga e’yo omvi tinia: ‘Ba dria alu alu yi ’diri mvupi ri yi vico ni nga eri fu dika, te yi mani nga fele ri nga fe erini o’azu ’dani ’dani.’
Oku nga ’yo: ‘Opi la mi fe mani yi ’di i fo! Yi vico ma fu ani ma dika ku beni. Azini ma ngani emu yi ibe ’dia dika ku beni’
Oku ’di ega Yesu ni e’yo nze yi a’di adari ma dria. Isu deresi Yesuni eyo nze Mungu ma dria suru eri niri be. E’yo ada ’diri ekile yi idri niri le. Eco ’bani idri ’dani ’dani ri fe ra.
Yesu nga di ’yo oku tia: ‘Mi mu agupi miniri omve vutinia mi ida dri doa.’
Oku nga ’yo Yesu tia: ‘Ma agupi yo.’
Yesu ’yo eri tia: ‘Mi ’yo ’yeke adusiku mi ovu ndra agupi be towi, mini ovuzu eribe curu’do ri ovuni agupi mini ku.’
Oku nga osu tu, a’dusiku e’yo dria Yesuni nze ’diyi eyi e’yo ada ni. Yesu ni e’yo ’diyi ngoni ngoni ya? Ni e’yo ’diyi ki a’dusiku erini ovule ’ba ndra Oyo ni sole ’bo Mungu ni tini epele ri i risi. Ani nita nde ’di enga Mungu vu. Yesuni nga e’yo nzeria oku Samaria ni ’di be ria, ’ba eri vuti bipi ’diyi ngaki eca dika o’aki osuta si Yesuni e’yo nzezu oku samariaru ri be risi.
E’yo amani oni ’dia ri ngoni? Efini kini Yesuni yiki ru ’ba dria vu. Ani le ama ma o’aki eri le. Le ama ma egaki kini ’ba azini ki onzi lu eyini engazu suru azini ma alearisi ’dini ku. Yesu le ’ba dria ma isu e’yo ada idri ’dani ’dani niri ra. Le vini ama ma fe ’ba dria ma isu e’yo ada ’di indi.
