ສົນທະນາກັບຍິງທີ່ນ້ຳສ້າງ
ບົດ 90
ສົນທະນາກັບຍິງທີ່ນ້ຳສ້າງ
ພະເຍຊູຢຸດພັກຂ້າງນ້ຳສ້າງໃນແຂວງສະມາລີ. ພວກສາວົກຂອງພະອົງເຂົ້າໄປໃນເມືອງເພື່ອຊື້ອາຫານ. ພະເຍຊູພວມເວົ້າກັບຍິງທີ່ມາຕັກນ້ຳ. ພະອົງກ່າວແກ່ນາງວ່າ: ‘ຂໍນ້ຳໃຫ້ເຮົາດື່ມແດ່.’
ຄຳນີ້ເຮັດໃຫ້ຍິງນັ້ນປະຫຼາດໃຈຫຼາຍ. ເຈົ້າຮູ້ບໍວ່າເປັນຫຍັງ? ເພາະວ່າພະເຍຊູເປັນຊາວຍິວ ແລະນາງເປັນຊາວສະມາລີ. ແລະຊາວຍິວສ່ວນຫຼາຍບໍ່ມັກຊາວສະມາລີ. ຊາວຍິວເຖິງກັບບໍ່ເວົ້າກັບພວກເຂົາ! ແຕ່ພະເຍຊູຮັກປະຊາຊົນທຸກຈຳພວກ. ດັ່ງນັ້ນພະອົງຈຶ່ງກ່າວວ່າ: ‘ຖ້າເຈົ້າໄດ້ຮູ້ຈັກຜູ້ທີ່ຂໍນ້ຳຈາກເຈົ້າວ່າເປັນຜູ້ໃດແລ້ວ ເຈົ້າຄົງຈະຂໍແຕ່ທ່ານຜູ້ນັ້ນແລະທ່ານຈະໃຫ້ນ້ຳອັນກໍ່ໃຫ້ເກີດຊີວິດແກ່ເຈົ້າ.’
ຜູ້ຍິງນັ້ນເວົ້າວ່າ: ‘ທ່ານເຈົ້າຂ້າ ນ້ຳສ້າງນີ້ເລິກແລະທ່ານບໍ່ມີແມ່ນແຕ່ຖັງຕັກນ້ຳ. ນ້ຳອັນກໍ່ໃຫ້ເກີດຊີວິດນັ້ນທ່ານຈະໄດ້ມາຈາກໃສ?’
ພະເຍຊູອະທິບາຍວ່າ: ‘ຫາກເຈົ້າດື່ມນ້ຳຈາກນ້ຳສ້າງນີ້ເຈົ້າຈະກະຫາຍອີກ. ແຕ່ນ້ຳທີ່ເຮົາຈະໃຫ້ນັ້ນສາມາດເຮັດໃຫ້ຄົນນັ້ນມີຊີວິດຕະຫຼອດໄປເປັນນິດໄດ້.’
ຜູ້ຍິງນັ້ນເວົ້າວ່າ: ‘ທ່ານເຈົ້າຂ້າ ຂໍໃຫ້ນ້ຳນີ້ແກ່ຂ້າພະເຈົ້າເຖີດ! ເພື່ອຂ້າພະເຈົ້າຈະບໍ່ຫິວນ້ຳອີກເລີຍ. ແລະຈະບໍ່ຕ້ອງມາຕັກນ້ຳທີ່ນີ້ອີກຕໍ່ໄປ.’
ຍິງຄົນນັ້ນຄິດວ່າພະເຍຊູພວມເວົ້າໝາຍເຖິງນ້ຳແທ້ໆ. ແຕ່ພະອົງເວົ້າໝາຍເຖິງຄວາມຈິງກ່ຽວກັບພະເຈົ້າແລະລາຊະອານາຈັກຂອງພະອົງ. ຄວາມຈິງນີ້ເປັນເໝືອນກັບນ້ຳອັນກໍ່ໃຫ້ເກີດຊີວິດ ແລະຈະສາມາດກໍ່ໃຫ້ຄົນເຮົາມີຊີວິດຕະຫຼອດໄປໄດ້.
ຕອນນີ້ພະເຍຊູບອກກັບຍິງນັ້ນວ່າ: ‘ຈົ່ງໄປເອີ້ນຜົວຂອງເຈົ້າແລ້ວກັບມາ.’
ນາງຕອບວ່າ: ‘ຂ້າພະເຈົ້າບໍ່ມີຜົວ’
ພະເຍຊູກ່າວວ່າ: ‘ເຈົ້າເວົ້າຖືກແລ້ວ ແຕ່ເຈົ້າເຄີຍມີຜົວຫ້າຄົນແລ້ວ ແລະຊາຍທີ່ເຈົ້າພວມຢູ່ດ້ວຍດຽວນີ້ບໍ່ແມ່ນຜົວຂອງເຈົ້າ.’
ຍິງນັ້ນປະຫຼາດໃຈ ເພາະວ່າທັງໝົດນີ້ເປັນຄວາມຈິງ. ພະເຍຊູຮູ້ສິ່ງເຫຼົ່ານີ້ໄດ້ຢ່າງໃດ? ຈິງແທ້ ກໍ່ເພາະພະເຍຊູເປັນຜູ້ທີ່ພະເຈົ້າໄດ້ສັນຍາວ່າຈະສົ່ງມາ ແລະພະເຈົ້າໄດ້ແຈ້ງເລື່ອງນີ້ໃຫ້ພະອົງຊາບ. ໃນຂະນະດຽວກັນນີ້ພວກສາວົກຂອງພະເຍຊູກັບມາ ແລະພວກເຂົາແປກໃຈທີ່ພະເຍຊູພວມເວົ້າກັບຍິງຊາວສະມາລີ.
ພວກເຮົາໄດ້ຮຽນຮູ້ຫຍັງແດ່ຈາກເລື່ອງທັງໝົດນີ້? ເລື່ອງນີ້ສະແດງໃຫ້ຮູ້ວ່າພະເຍຊູມີຄວາມເມດຕາຕໍ່ຜູ້ຄົນທຸກເຊື້ອຊາດ. ແລະເຮົາຄວນຈະເຮັດຢ່າງນັ້ນດ້ວຍ. ເຮົາບໍ່ຄວນຄິດວ່າບາງຄົນເປັນຄົນບໍ່ດີພຽງແຕ່ເພາະວ່າເຊື້ອຊາດຂອງເຂົາບໍ່ຄືກັນກັບເຮົາ. ພະເຍຊູຕ້ອງການໃຫ້ທຸກຄົນຮູ້ຄວາມຈິງຊຶ່ງຈະນຳໄປສູ່ຊີວິດຕະຫຼອດໄປ. ເຮົາຄວນຈະມີຄວາມປາຖະໜາທີ່ຈະຊ່ວຍຜູ້ຄົນໃຫ້ຮູ້ຈັກຄວາມຈິງດ້ວຍ.
