JE Jesús ya kisikjáya ya jñani tíjnachrian jngo xjáonandá ya Samaria. Je chjota tjenngile kui tsojmi xi skine kikatse. Je chjoón xi tífákaosí Jesús nandá kichokʼá. Kitsole Jesús: “Tʼainai nandá xi skʼuia”.

Tokʼoakoanle chjoón jebi nga kʼoasʼin je tsakjákao. A ʼyaní ánni. Kuinga chjota judío je Jesús, kʼoa chjoón samaritananí chjoón jebi. Kʼoa me ngatsʼi je chjota judío nga tsín tsjoake je chjota samaritano. ¡Saʼnda tsín tsakjákao xínkjín! Tonga je Jesús tsjoake koan toʼya chjotani. Kitsole je chjoón: “Tsa to ʼyalani ʼyani xi nandá tísíjéli, sijéjinlai, kʼoa je tsjoájinli nandá xi tsjoá kjoabijnachon”.

Kitso je chjoón: “Ji Nai, je xjáonandá nʼio na̱nga̱, kʼoa lijme xi kichʼai xi chʼasjeni nandá. Jñáni kʼuinchʼai je nandá xi tsjoá kjoabijnachon”.

Kitso Jesús: “Tsakui sʼui nandá xi nya xjáonandá jebi koa̱nfati ijngokʼanili. Tonga je nandá xi tsjoa an koa̱n sikʼéjnakon chjota ngantsjai nichxin”.

Kitso je chjoón: “Ji Nai, ¡tʼainai je nandá jebi! Ánni nga tsínti koa̱nfatisínina, kʼoa tsínkʼia ti i̱ kjoeʼekʼasíña nandá”.

Je chjoón kʼoasʼin koanjinle nga ñaki nandá xi kitsole Jesús. Tonga nandá xi kinchjani Jesús kuiní jokjoan tjínni xi tʼatsʼe Niná kao tʼatsʼe Rey xi kiskoejin, joni tsa nandá xi ʼyoa kʼianga sikatíokonná. Je xi kixi tjín xi tʼatsʼe Niná koa̱nle tsjoá kjoabijnachon xi tsínkʼia fetʼa.

Je Jesús kitsole je chjoón: “Tʼin, tʼinkinókjoalai xʼinli kʼoa nroa ijngokʼani ibi”.

Kitso je chjoón: “Tsínna xʼin”.

Kitso Jesús: “Kʼoatjín jotisi. Tonga kjoan aon xʼin je kisʼeli, kʼoa je chjota xi tijnakoai ndʼaibi a litsa xʼinlijin ma”.

Tokʼoakoanle je chjoón, nga ñaki kʼoatjín jmeni xi tsakʼinle. Jósʼin tsabeni Jesús xi tʼatsʼe jebi. Kuinga Niná kisikasén kʼoa nga je xi kʼoasʼin kiskoejin, kʼoa jé Niná xokitsole xi tʼatsʼe jebi. Xijekoan, kichó chjota tjenngile Jesús, kʼoa tokʼoakoanle nga jngo chjoón samaritana tífákao.

Jméni xi bakóyaná xi tʼatsʼe jebi. Kui bakóyaná nga nda kisikao Jesús tojokji chjotani. Kʼoati tjínnená sʼian tsandañá; a likui koa̱n nga chʼaosʼin sikjaʼaitsjen tʼatsʼe xi xín tsʼe kao xi kjaʼai sʼin tsen yaole. Je Jesús mele nga katabe ngatsʼi chjota xi kixi tjín xi bichokaoná kjoabijnachon xi tsínkʼia fetʼa. Kʼoati tjínnená tsandañá nga kuisenkoa je chjota nga katabe xi kixi tjín tʼatsʼe Niná.