TA̱ Jesús ni̱xa̱a̱ra ndákiʼinndéera yu̱ʼu̱ pozo ñuu Samaria. Na̱ discípulora ku̱a̱ʼa̱nna chí ñuu Samaria satána á kueena ña̱ʼa kuxuna. Ñá ñaʼá ñá nátúʼun ta̱ Jesús xíʼin yóʼo va̱xiñá taváñá ti̱kui̱í ini pozo. Ta̱ Jesús káʼa̱nra xíʼinñá: ʼTaxi loʼo ti̱kui̱í koʼi̱ʼ.

Ña̱ ni̱ka̱ʼa̱n ta̱yóʼo xíʼinñá nda̱kanda̱-iniñá xíʼinra. ¿Á xíni̱ún ndachun nda̱kanda̱-iniñá? Saáchi ta̱ Jesús ta̱ ñuu Judá kúúra, ta ñáyóʼo ñá ñuu Samaria kúúñá. Na̱ ñuu Judá kǒo kúni̱na xínina na̱ ñuu Samaria. Ni kǒo káʼa̱n xíʼin táʼanna. Soo ta̱ Jesús va̱ʼa ndiʼiva na̱ yiví nu̱úra. Ta káchira xíʼinñá: ʼTá ná kunda̱a̱-iniún ndáa ta̱a kúú yi̱ʼi̱ ta ndúkúi̱ ti̱kui̱í nu̱ún, ta miívaún ndukú ti̱kui̱í nu̱íi̱, ta yi̱ʼi̱ taxii̱ ti̱kui̱í koʼún tá taxi kutakún ndiʼi tiempoʼ.

Ñáyóʼo káʼa̱nñá xíʼin ta̱ Jesús: ʼTáta, ña̱ pozo yóʼo kúnuní iniña, ta kǒo ña̱ʼa níʼún ña̱ taváúnrá. ¿Míí ku̱ʼún kiʼún ti̱kui̱í taxiún ndaʼíi̱ koʼi̱?

Ta̱ Jesús ni̱ka̱ʼa̱nra xíʼinñá: ʼTá ná koʼún ti̱kui̱í yóʼo tuku yi̱chi̱-iniún, soo ti̱kui̱í taxi yi̱ʼi̱ koʼún táyóʼo taxi kutakún ndiʼi tiempoʼ.

Ñáyóʼo káʼa̱nñá xíʼin ta̱ Jesús: ʼTáta, taxi ti̱kui̱í táʼanrá káʼún xa̱ʼa yóʼo koʼi̱. Tasaá kǒo yi̱chi̱ka-inii̱. Ta va̱ása kixikai̱ tavái̱ ti̱kui̱í ini pozo yóʼoʼ.

Chi ñáyóʼo ndákanixi̱níñá, ti̱kui̱í tá xíʼivayó káʼa̱n ta̱ Jesús xa̱ʼa túviñá. Soo ta̱ Jesús xa̱ʼa tu̱ʼun Ndióxi̱ káʼa̱nra xíʼinñá, chi ña̱yóʼo tá íyo ti̱kui̱í tá taxi kutakuyó ndiʼi tiempo saá íyoña.

Ta vitin ni̱ka̱ʼa̱n ta̱ Jesús xíʼinñá: ʼKuaʼán ka̱ʼún xíʼin yiíún ná kixira xíʼúnʼ.

ʼKǒo yiíi̱ʼ, káchiñá.

ʼÑa̱ nda̱a̱ káʼún kǒo yiíún, soo xa̱ni̱xi̱yo u̱ʼu̱n yiíún, ta̱ íyo xíʼún vitin su̱ví yiíún kúúraʼ, káchi ta̱ Jesús.

Ñáyóʼo nda̱kanda̱-iniñá, chi ña̱ ni̱ka̱ʼa̱nra xíʼinñá míí ña̱ ndixa kúúña. ¿Ndachun va̱ʼa na̱kunda̱a̱-ini ta̱ Jesús xa̱ʼa ña̱yóʼo? Saáchi Ndióxi̱ kúú ta̱ chi̱ndaʼá-ñaʼá ña̱ va̱xira, ta míí Ndióxi̱ táxi ña̱ kúnda̱a̱-inira xa̱ʼa ña̱yóʼo. Ta vitin na̱ discípulo ta̱ Jesús ki̱xa̱a̱vana, ta nda̱kanda̱-inina tá xi̱nina nátúʼunra xíʼin iin ñaʼá ñá ñuu Samaria.

¿Ndáaña sánáʼa̱ ña̱yóʼo miíyó? Sánáʼa̱ña miíyó, ta̱ Jesús va̱ʼaní ni̱xi̱yo-inira xíʼin ndiʼi na̱ yiví. Tasaá xíniñúʼu koo miíyó xíʼinna. Va̱ása va̱ʼa ndakanixi̱níyó xa̱ʼa na̱ yiví na̱ inka ñuu su̱ví na̱ va̱ʼa kúúna. Ta̱ Jesús kúni̱ra ndiʼi na̱ yiví ná kunda̱a̱-inina xa̱ʼa Tu̱ʼun Ndióxi̱ ta kutakuna ndiʼi tiempo. Ta miíyó xíniñúʼu chindeé táʼanyó xíʼinna ña̱ va̱ʼa sakuaʼana xa̱ʼa Ndióxi̱.