Jesús tajtoj iuan se siuat itech ameyal
Tanojnots 90
Jesús tajtoj iuan se siuat itech ameyal
JESÚS motsakuilij itech se ameyal tein moajsi Samaria uan ompa moseuijtok. Imomachtijkauan yajkej itech altepet kikouatoj toni kikuaskej. Uan siuat akin Jesús iuan tajtojtok atakuiko. Jesús kiiluij: ‘Xinechuanti tsikitsin at’.
Siuat kitelmojkakakik. ¿Tikmati keyej? Jesús katka judío, uan siuat katka samaritana. Uan miakej judíos amo kiniyekitayaj samaritanos. ¡Niono kininotsayaj! Sayoj ika Jesús kintasojtaya nochin taltikpakneminij. Yej kiiluij siuat: ‘Komo tikmatiskia akoni mitstajtania at, tej tiktajtaniskia, uan yej mitsmakaskia at tein kitemaka nemilis’.
Siuat kijtoj: ‘Tejuatsin, ameyal tel uejkatan, uan amo tikpia toni ika tikixtis. ¿Kani tikuiti at tein kitemaka nemilis?’
Jesús kiiluij: ‘Komo titayi nejin at oksepa tiamikis. Sayoj ika at tein nimitsmakati ueli kichiua maj se nemi nochipaya’.
Siuat kijtoj: ‘Tejuatsin, ¡xinechmaka nejon at! Ijkon, amo kemanok niamikis. Uan amo no monekisok niatakuikiuj’.
Siuat moluiaya ika Jesús kinojnotstoya ika yekmelauj at. Uan amo ijkon, ta ika kinojnotstoya tein melauak kijtoua Dios uan itekiuajyo, tein tamati kemej at tein kitemaka nemilis. Ueli kitemaka nemilis nochipaya.
Ompa, Jesús kiiluij siuat: ‘Xiknotsati monamik uan oksepa xiuiki’.
Siuat kijtoj: ‘Amo nikpia nonamik’.
Jesús kiiluij: ‘Kuali titanankilij. Sayoj ika tikinpiak makuil monamikuan, uan takat tein axkan iuan tinemi amo monamik’.
Nejon katka melauak, uan yejika siuat kimojkakakik. ¿Keniuj kimatik Jesús nochi nejon? Dios kimatiltij, porin Jesús katka akin Dios motenkaujka ika kititaniskia. Ompa, imomachtijkauan Jesús mokepkej, uan kimojkaitakej Jesús maj kinojnotstoni se samaritana.
¿Toni technextilia nochi nejin? Ika Jesús katka kualtakat imiuan nochin taltikpakneminij. Tejuan no ijkon maj timochiuakan; maj amo timoluikan ika aksa amo yolkuali sayoj porin chijchipauak oso maseual. Jesús kinekia maj nochin taltikpakneminij kiixmatinij iTajtol Dios tein teuika itech nemilis nochipaya. Uan tejuan maj no tiknekikan tikinpaleuikan taltikpakneminij maj kiixmatikan.
