Jesús omotlapoui iuan se siuatl inakastlan se atekochtli
TLAPOUALISTLI 90
Jesús omotlapoui iuan se siuatl inakastlan se atekochtli
JESÚS moketsa pampa moseuis inakastlan se atekochtli itech Samaria. Imachtijkauan oyajkej itech altepetl pampa kikoaskej tlakuali. Siuatl tlen motlapouijtok iuan Jesús ouala pampa kikixtis atl. Jesús okilui: ‘Xinechmaka atl’.
Nin okitlajtlachialti miak siuatl. ¿Tikmati tleka? Jesús okatka judío uan siuatl okatka samaritana. Uan miakej judíos amo okintlasojtlayaj samaritanos. ¡Nion okinnotsayaj! Maski ijkon, Jesús okintlasojtlaya nochtin tlaltikpaktlakamej. Jesús okilui: ‘Tla te tikmatiskia akin mitstlajtlanilijtok atl, te tiktlajtlaniliskia, uan ye mitsmakaskia atl tlen kitemaka yolilistli’.
Siuatl okinankili: ‘Noteko, atekochtli uejkatlan, uan amo tikpia tlen ika tikkixtis atl. ¿Kanin tikuiti atl tlen kitemaka yolilistli?’.
Jesús okiyekilui: ‘Tla tikonis atl tlen ameya itech nin atekochtli, oksepa tiamikis. Maski ijkon, atl tlen ne nimitsmakas uelis kichiuas ma se yolto nochipa’.
Siuatl okilui: ‘Noteko, xinechmaka non atl. Ijkon, amo keman niamikis. Uan amo keman nikixtiki atl itech nin atekochtli’.
Siuatl okineltokak Jesús okitlapouijtoka itech atl tlen tikonij. Maski ijkon, Jesús okitlapouijtoka tlen melauak itech toTajtsin Dios uan iTekiuajkayo, tlen yetok ken atl tlen kitemaka yolilistli. Uelis kitemakas yolilistli tlen amo keman tlamis.
Jesús axkan okilui siuatl: ‘Xio uan xiknotsati monamik uan xiualmokuepa’.
Siuatl okilui: ‘Ne amo nikpia nonamik’.
Jesús okilui: ‘Kuali otinechnankili. Maski ijkon, yotikinpixki makuili monamik, uan tlakatl akin iuan tichanti axkan, ye amo monamik’.
Siuatl omotlajtlachialti, pampa nochi tlen Jesús okilui okatka melauak. ¿Ken okimatiaya Jesús ninmej tlamantli? Kema, Jesús ye akin toTajtsin Dios okijto Ualaskia, akin ye okiualtitlanki, uan toTajtsin Dios ye akin okimatilti nochi nin tlamantli. Ijkuakon, imachtijkauan Jesús omokuepkej, uan omotlajtlachialtijkej pampa Jesús omotlapouijtoka iuan se samaritana.
¿Tlen timomachtiaj itech nochi nin? Jesús kintlasojtla nochtin tlaltikpaktlakamej tlen tlatlamantli inaltepetl. Tejuan noijki ijkon moneki timokuayejyekoskej; amo tikijtoskej akaj amo yolkuali san pampa uits itech okse altepetl. Jesús kineki nochtin tlaltikpaktlakamej ma momachtikan tlen melauak, tlen uelis kichiuas ma kipiakan yolilistli tlen amo keman tlamis. Uan tejuan noijki moneki tikinpaleuiskej akinmej kinekij momachtiskej tlen melauak.
