HESUS a sinta pa sosegá na un pos na Samaria. Su disipelnan a bai na e pueblo pa kumpra kuminda. E señora ku ken Hesus ta papia a bini pa saka awa. Hesus a bis’é: ‘Duna mi poko awa.’

Esei a sorprendé e señora hopi. Bo sa pakiko? Pasobra Hesus tabata hudiu, i e señora tabata samaritano. I mayoria hudiu no tabata gusta samaritano. Ni sikiera nan tabata papia ku nan! Pero Hesus a stima tur sorto di hende. P’esei el a bisa: ‘Si bo tabata sa ta ken ta pidi bo awa, lo bo pidié i e lo duna bo awa ku ta duna bida.’

E señora a bisa: ‘Señor, e pos ta hundu, i bo no tin ni un hèmber. Unda bo ta bai haña awa ku ta duna bida?’

Hesus a bisa: ‘Si bo bebe awa di e pos aki lo bo haña set atrobe. Pero e awa ku mi ta duna por hasi hende biba pa semper.’

E señora a bisa: ‘Señor, duna mi e awa ei! E ora ei mi no tin ku sinti set nunka mas. I lo mi no tin ku bini aki pa saka awa atrobe.’

E señora a kere ku Hesus tabata kier men awa mes. Pero Hesus tabata kier men e bèrdat di Dios i su reino. E bèrdat ei ta manera awa ku ta duna bida. E por hiba hende na bida eterno.

Awor Hesus a bisa e señora: ‘Bai yama bo kasá i bini bèk.’

El a kontestá: ‘Mi no tin kasá.’

Hesus a bisa: ‘Bo tin rason. Pero bo tabatin sinku esposo i bo kompañero aktual no ta bo kasá.’

E señora a keda asombrá, pasobra tur esei tabata bèrdat. Kon Hesus por a sa tur esei? Sí, dor ku Hesus tabata Esun ku Dios a primintí di manda, i Dios a dun’é e informashon. Na e momentu ei e disipelnan di Hesus a yega, i nan keda sorprendí ku Hesus tabata papia ku un señora samaritano.

Kiko nos ta siña di tur esei? Esei ta mustra ku Hesus a trata hende di tur rasa ku bondat. I nos tin ku hasi meskos. Nos no mag pensa ku algun hende ta malu debí na nan rasa. Hesus ke pa tur hende konosé e bèrdat ku ta hiba na bida eterno. I nos tambe mester ke yuda hende siña e bèrdat.

Juan 4:5-43; 17:3.