KUA noo a Iesu i te akangaroi i te pae i tetai ruavai i Samaria. Kua aere tana au pipi ki te oire i te oko kai. Ko te vaine ta Iesu e tuatua ra kua aere mai i te tiki vai. Karanga atu aia kiaia e: ‘Omai ana i tetai vai inu noku.’

Kua poitirere tikai te vaine i teia. Kua kite koe e no teaa ra? No te mea e ngati Iuda a Iesu, e e vaine Samaria aia. E ko te maataanga o te ngati Iuda kare e inangaro ana i to Samaria. Kare ratou e tuatua ua atu ana kia ratou! Inara e inangaro ana a Iesu i te au tu tangata pouroa. No reira aia i karanga ai e: ‘Naringa koe i kite e koai teia e pati atu nei i te vai inu, ka pati mai koe kiaia e ka oronga atu aia i te vai ora noou.’

‘E te Atu,’ i karanga ai te vaine, ‘e oonu te ruavai e kare aau pakete. Akapeea e rauka ai ia koe teia vai ora?’

‘Me inu koe i te vai no teia ruavai ka kaki vai akaou koe,’ i akamarama ei a Iesu. ‘Tera ra te vai taku ka oronga atu ka akariro i te tangata kia ora e tuatau ua atu.’

‘E te Atu,’ i karanga ai te vaine, ‘omai ana i tena vai! Kare i reira au e kaki vai akaou. E kare katoa au e oki akaou mai ki konei e tiki vai.’

Manako te vaine e te tuatua ra a Iesu no runga i te vai tika tikai. Inara te tuatua ra aia i te tuatua mou no runga i te Atua e tona patireia. Kua aite teia tuatua mou mei te vai ora rai. Ka oronga mai i te ora mutu kore no tetai tangata.

Kua akakite a Iesu i teianei ki te vaine e: ‘Aere e tiki i taau tane e oti e oki mai.’

‘Kare aku tane,’ i pau mai ei aia.

‘Kua tano taau pauanga,’ i karanga ai a Iesu. ‘E rima aau tane i mua ana e ko te tangata e noo ra koe i teianei, kare aia i te tane naau.’

Umere tikai te vaine, no te mea e tika teia au mea pouroa. Akapeea ra a Iesu i kite ei i teia au mea? Ae, kua kite aia no te mea ko Iesu Tei Taputouia kua tonoia mai aia e te Atua, e na te Atua i akakite kiaia teia au mea. I taua taime ra kua oki mai te au pipi a Iesu, e kua poitirere ratou e te tuatua ra aia ki tetai vaine Samaria.

Eaa ta tatou ka tamou mai mei teia au mea pouroa? Te akaari maira te reira e e tu takinga meitaki to Iesu i te tangata o te au iti tangata tukeke pouroa. E ka tau katoa tatou kia pera. Eiaa tatou e manako e e kino tetai aronga no te mea ua nei e e iti tangata ke. Inangaro a Iesu i te au tangata pouroa kia kite i te tuatua mou te ka taki atu ki te ora mutu kore. E ka inangaro katoa tatou i te tauturu i te tangata kia apii i te tuatua mou.