JESUS para atu deskansa iha bee-matan ida iha Samaria. Ninia dixípulu sira bá tiha ona ba sidade atu hola hahán. Feto neʼebé koʼalia daudauk ho Jesus mai atu kuru bee. Jesus hatete ba nia: ‘Fó bee mai haʼu atu hemu.’

Feto neʼe hakfodak tebes. Hatene tanbasá? Tanba Jesus ema judeu, no nia samaritana. Ema judeu barak la gosta ema samaritanu sira. No mós ema judeu lakohi koʼalia ba sira! Maibé Jesus hadomi ema hotu-hotu. Nuneʼe nia hatete: ‘Se ó hatene sé mak ema neʼebé husu daudauk bee atu hemu karik, ó sei husu nia no nia sei fó bee neʼebé fó moris ba ó.’

Feto neʼe hatete: ‘Señór, bee-matan neʼe naruk, no Ita la iha balde. Iha neʼebé mak Ita hetan bee neʼebé fó moris?’

Jesus esplika: ‘Se ó hemu bee husi bee-matan neʼe, ó sei hamrook fali. Maibé, bee neʼebé haʼu sei fó bele halo ema moris ba nafatin.’

Feto neʼe hatete: ‘Señór, fó bee neʼe mai haʼu! Hanesan neʼe, haʼu sei la hamrook tan, no haʼu la presiza tan mai iha neʼe atu kuru bee.’

Feto neʼe hanoin katak Jesus koʼalia kona-ba bee baibain. Maibé, nia koʼalia lia-loos kona-ba Maromak no ninia reinu. Lia-loos neʼe hanesan bee neʼebé fó moris. Ida-neʼe bele fó moris rohan-laek ba ema.

Agora Jesus hatete ba feto neʼe: ‘Bá no bolu ó-nia laʼen no fila fali mai.’

Nia hatán: ‘Haʼu la iha laʼen.’

Jesus hatete: ‘Ó hatán loos. Maibé, ó iha ona laʼen naʼin-lima, no mane neʼebé agora ó hela hamutuk laʼós ó-nia laʼen.’

Feto neʼe hakfodak, tanba buat hotu neʼe loos duni. Tansá mak Jesus hatene buat hirak-neʼe? Loos, tanba Jesus mak ema neʼebé Maromak haruka mai nuʼudar promete nanis ona, no Maromak mak fó-hatene buat sira-neʼe ba Jesus. Hafoin, Jesus nia dixípulu sira mai fali, no sira hakfodak haree Jesus koʼalia daudauk ho feto samaritana ida.

Saida mak ita aprende husi istória neʼe? Ita hatene katak Jesus hatudu laran-diʼak ba ema husi rasa hotu. Ita mós tenke halo hanesan neʼe. Ita la bele hanoin aat ba ema balu tan deʼit sira mai husi rasa seluk. Jesus hakarak ema hotu atu hatene lia-loos neʼebé lori sira ba moris rohan-laek. Ita mós tenke hakarak ajuda ema atu aprende lia-loos.