90-нҗы хекая

Самариялы аял билен гуйының башында

ИСА Самарияда дынч алмак үчин гуйының башында отуряр. Онуң шәгиртлери чөрек сатын алмак үчин шәхере гитдилер. Шу аралыкда Иса гуюдан сув чекмәге гелен аял билен гүрлешйәр. Иса оңа: «Маңа ичмәге сув берсене» диййәр.

Аял муңа өрән гең галяр. Билйәңми нәме үчин? Себәби Иса ехудыды, аял болса самариялы. Ехудылар самариялылары халамаярды. Олар самариялылар билен хатда гүрлешмейәрдилер! Йөне Иса хемме адамлары говы гөрйәрди. Шонуң үчин: «Сен кимиң сув сораяныны билседиң, онда сен онуң өзүнден сув сорардың. Ол хем саңа яшайыш берйән сув берерди» дийди.

Аял гең галып:

— Агам, гуйы чуң. Сениң бедрәң ёк. Сен яшайыш берйән сувы ниреден алҗак? — дийди.

Иса җогап берип:

— Сен шу гуюдан сув ичсең, ене-де сувсарсың. Йөне Мениң берҗек сувумы ичсең, сен эбеди яшарсың — дийип дүшүндирйәр.

Аял оңа:

— Агам, маңа шол сувдан берсене! Сувсамайын. Сув алмага шу гуя гелмәйин — дийди.

Самариялы аял Иса адаты сув барада айдяндыр өйдйәр. Йөне Иса оңа Худай ве онуң патышалыгы барадакы хакыкаты айдярды. Бу хакыкат — сув ялы яшайыш берйәр. Ол адама эбеди яшайыш берйәр.

Шонда Иса аяла:

— Гит-де, әриңи чагырып гел — дийди.

Аял оңа:

— Мениң әрим ёк — дийип җогап берди.

Иса-да оңа:

— «Әрим ёк» дийип, догры айтдың. Сениң бәш әриң барды. Йөне хәзирки яшашян өз әриң дәл — дийди.

Самариялы аял муңа хайран галяр, себәби онуң айдяны догруды. Эмма Иса муны нәдип билдикә? Догры, Иса Худайың Вада эдип иберен адамыды. Бу затлары оңа Худай айдяр. Шол вагт Исаның шәгиртлери гелди. Онуң самариялы аял билен геплешип дуранына хайран галдылар.

Биз мундан нәме өвренип билерис? Диймек, Иса адамың миллетине серетмейәр. Бизем шейле болмалы. Башга миллетли адамлары йигренмели дәл. Иса эбеди яшайша элтйән хакыкаты хемме адамларың билмегини ислейәр. Бизде-де адамлара хакыкаты өвретмек ислеги болмалы.

Яхя 4:5—43; 17:3.