САМА́РИЯГА Иисус кудук чанынга дыштанып алыр дээш доктаапкан. Ооң өөреникчилери чем садып алыр дээш, хоорайже кире берген. Ол үеде Иисус суглап келген херээжен-биле чугаалажы берген. Ол оон дилээн: ‘Меңээ ижер сууңдан берем’.

Херээжен кижи кайгап калган. Чүге, билир сен бе? Чүге дээрге Иисус — иуде́й, а ол Сама́рия чурттуг. Иуде́йлерниң хөй кезии самари́йжилерге ынак эвес. Олар-биле безин чугаалашпас! Ынчалза-даа Иисус шупту улуска ынак. Ынчангаш ол чугаалаан: ‘Кым сенден суг дилеп турарын билген болзуңза, сен бодуң оон ижер сугну дилээр ийик сен, а ол сеңээ чуртталга бээр сугну бээр ийик’.

— Дээрги, кудук ханы болгай, а сенде хымыш безин чок. Чуртталганы бээр сугну канчап узуп алыр сен?— деп, херээжен кайгай берген.

— Бир эвес бо кудуктан сугну ижип алыр болзуңза, оон база суксай бээр сен — деп, Иисус тайылбырлаан.— Мээң бээр суум кижиге мөңге чуртталганы бээр.

— Дээрги,— деп, херээжен дилээн,— меңээ ол сугдан берип көрем! Ынчан мен моон соңгаар кажан-даа суксавас мен. Ынчангаш мен бээр суглап келбес апаар мен.

Иисус анаа суг дугайында чугаалап турар деп, херээжен бодап турар. Ынчалза-даа ол алыс шын дугайында чугаалаан: Бурганның дугайында алыс шынны болгаш ооң чагыргазының дугайында. Ол алыс шын чуртталга бээр сугга дөмей. Ол кижиге мөңге чуртталганы берип шыдаар.

Ынчан Иисус херээженни дилээн: ‘Барып ашааңны бээр эдертип эккел’.

— Мээң ашаам чок,— деп, херээжен миннип чугаалаан.

— Сен шынны чугааладың,— деп, Иисус чугаалаан.— Сен беш ашактыг турдуң, а ам кады чурттап турарың кижи сээң ашааң эвес-тир.

Херээжен хөлчок кайгаан, чүге дизе ол шупту шын. А Иисус ону кайыын билип алган? Шын-дыр, Иисус — Бурганның Аазаан төлээзи, ынчангаш ол медээлерни аңаа Бурган берип турар. Ол үеде Иисустуң өөреникчилери эглип келген — көөрге, Иисус Сама́рия чурттуг херээжен-биле чугаалажып турар боорга, олар хөлчок кайгааннар.

Бис моон чүнү өөренип ап болур бис? Иисус шупту язы-сөөк кижилерге ээлдек, деп көрүп тур бис. Бис база шак-ла ындыг эвилең-ээлдек болур ужурлуг бис. Чүгле өске язы-сөөкке хамаарышкан дээш, кандыг бир-ле кижини багай деп санавас ужурлуг бис. Иисус мөңге чуртталгага чедирер алыс шынны шупту кижилер билип алзын деп күзеп турар. Кижилерни алыс шынга өөредир күзел бисте база турар ужурлуг.