Tantara 90

Jesosy Tamy Vôvo

JESOSY nidôko tamy vôvo araiky ta Samaria, nangala kajo. Tamy zen̈y mpianatranany aby io nandeha tan-tanàna, nivanga hanin̈y. Man̈angy ikoran̈an’i Jesosy io navy hantsaka rano. Jesosy nivolan̈a taminany: ‘Amia rano kony zaho higiahako.’

Man̈angy io lany fan̈ahy. Hainao antony? Fôtony Jesosy Jiosy, man̈angy io Samaritana. Ankamaraozan’ny Jiosy tsy tia Samaritana aby io. Irô tsy mivolan̈a amin-drô foeky! Fa Jesosy tsy nan̈avaka karazan’olo. Volan̈iny: ‘Izikoa hainao tsarabe olo mangataka rano aminao io, anao nangataka rano mahavelon̈o taminany.’

Man̈angy io nivolan̈a: ‘Vôvo lalin̈y be io. Anao amy zen̈y tsisy trobàka. Karakôry hazahoanao rano mahavelon̈o zen̈y?’

Jesosy nan̈azava: ‘Anao koa migiaka rano amy vôvo io, mbala ho sakara. Fa rano hamiako zen̈y mety hahavelon̈o olo tsisy farany.’

Man̈angy in̈y nivolan̈a: ‘Zaho mba amia rano zen̈y, beky zaho tsy sakara eky. Amy zen̈y koa zaho tsy mantsaka eto eky.’

Man̈angy io nieritreritry fa rano ankitin̈y nivolan̈in’i Jesosy in̈y. Kanefa ny marin̈y mikasiky Zan̈ahary ndreky fanjakan̈anany raha tiany volan̈iny. Miran̈a rano mahavelon̈o fo izio, mety hahavelon̈o olo tsisy farany.

Jesosy amy zay nivolan̈a tamy man̈angy io: ‘Mindao kahia vadinao.’

Man̈angy io nivolan̈a: ‘Zaho tsisy vady.’

Jesosy nivolan̈a: ‘Marin̈y ndreky volan̈anao zen̈y. Fa anao efa indimy niova vady, baka iô koa lelahy tran̈o araiky aminao iziô tsy vadinao.’

Gaga man̈angy io, fôtony raha jiaby zen̈y marin̈y aby. Karakôry nahaizan’i Jesosy raha jiaby zen̈y? Fôtony Jesosy, Araiky Nampan̈antinain̈y sady iraka Zan̈ahary, ke Zan̈ahary nan̈ambara izy raha jiaby zen̈y. Mpianatra Jesosy aby in̈y amy zay navy. Irô gaga nahita Jesosy nikoran̈a tamy man̈angy samaritana.

Ino raha ianaratsika boaka amy raha jiaby zen̈y? Hitatsika fa Jesosy tsara fan̈ahy tamy karazan’olo jiaby. Atsika koa tôkony karaha zen̈y. Atsika tsy tôkony han̈avakavaka olo tsy karazan̈a araiky amitsika. Tian’i Jesosy olo jiaby hahay ny marin̈y, ke hahazo fiain̈ana tsisy farany. Atsika koa tôkony han̈ampy olo, beky irô mahay ny marin̈y.

Jaona 4:5-43; 17:3.