YESU ajimi kuti apumule pacisima ca ku Samaliya. Ŵakumkuya ŵakwe apite kumsinda kukusuma yakulya. Jwamkongwe jwakuŵeceta ni Yesuju ayice kukuteka mesi. Jwalakwe akuŵeceta kwa jwamkongweju kuti: ‘Mungaŵile mesi.’

Yeleyi yikumsimonjesya mnope jwamkongweju. Ana akumanyilila ligongo lyakwe? Ligongo lyakuti Yesu ali jwa Ciyuda, soni jwamkongweju ali jwa Cisamaliya. Ni Ayuda ŵajinji nganiŵanonyelaga Asamaliya. Soni nganaŵecetanaga nawo! Nambo Yesu akusiŵanonyela ŵandu ŵamitundu josope. M’yoyo akuŵeceta kuti: ‘Mkaŵe kuti mkummanyilila jwakum’ŵenda mesijo, mkam’ŵendile jwalakwe, nipo akampele mesi gakupeleka umi.’

Jwamkongweju akuŵeceta kuti: ‘Ambuje cisimaci cili cakusokoka, soni wawo nganakola atamose cakutecela mesi. Sambano mesi gakupeleka umigo cagapate kwapi?’

Yesu akwanga kuti: ‘Pacimcimwa mesi gapacisimaci jicimkolasoni njota, nambo mesi gacinjipeleka, mpaka gamtendekasye mundu kutama ni umi kwangamala.’

Jwamkongweju akuŵeceta kuti: ‘Ambuje, ambe mesi gelego! Kuti ngasijingolasoni njota. Soni kuti ngayikaga apano kukuteka mesi.’

Jwamkongweju akuganisya kuti Yesu akuŵeceta ya mesi gasyesyene. Nambo jwalakwe akuŵeceta yakwamba usyesyene wa Mlungu ni ucimwene wakwe. Usyesyenewu uli mpela mesi gakupeleka umi. Mpaka gampe mundu umi wangamala.

Yesu akumsalila jwamkongweju kuti: ‘Mjawule mkaŵilanje ŵamkwenu kaneko mkayicesoni.’

Jwamkongweju akwanga kuti: ‘Une nganingola jwamlume.’

Yesu akuŵeceta kuti: ‘Mjanjile yisyene. Nambo mwalombegwe ni acalume msano, soni jwamlume jwamli najo sano, nganaŵa ŵamkwenu.’

Jwamkongweju akusimonga, ligongo lyakuti yosope yasasile Yesu yili yisyene. Ana Yesu ŵayimanyi catuli yeleyi? Ligongo lyakuti Yesu ali Jwacilangano, soni Mlungu ŵammanyisye yindu yeleyi. Pandaŵiji ŵakulijiganya ŵa Yesu awusile, ni akusimonga kuti Yesu akuŵeceta ni jwamkongwe jwa Cisamaliya.

Ana tukulijiganya cici pa yindu yosopeyi? Yikulosya kuti Yesu ali mundu jwacanasa kwa ŵandu ŵa mitundu josope. M’weji tukusosekwasoni kuŵa ŵacanasa. Tukaganisyaga kuti ŵandu ŵane ali ŵakusakala ligongo lyakuti ali ŵamtundu wine. Yesu akusaka kuti ŵandu wosope amanyilile usyesyene wawukusalongolela ku umi wangamala. M’wejisoni tukusosekwa kwakamucisya ŵandu kulijiganya usyesyene.