JESUSEʼ táan u jeʼelel yiknal upʼéel u chʼeʼenil Samaria. U j-kaambaloʼobeʼ bijaʼanoʼob teʼ kaaj u manoʼob baʼal utiaʼal jaantbiloʼ. Le koʼolel u yéet tsikbal Jesusoʼ taaljaʼan chʼaʼa jaʼ. Jesuseʼ tiaʼalajtiʼ: Síiten jaʼ in wukʼej.

Lelaʼ tu beetaj u jaʼakʼal u yóol le koʼolelaʼ. ¿A wojel wa baʼaxten? Tumen Jesuseʼ judío, letiʼeʼ samaritana. Tsʼoʼoleʼ le judíoʼoboʼ maʼatech u biskubaʼob yéetel le samaritanoʼoboʼ. Baʼaleʼ, Jesuseʼ u yaabilma tuláakal máak. Letiʼeʼ tiaʼalajtiʼ: Wa ka wojéelt máax le kʼáatiktech jaʼoʼ, techeʼ jeʼel a kʼáatik jaʼ tiʼeʼ, letiʼ túuneʼ jeʼel u tsʼáaiktech jaʼ ku tsʼáaik kuxtaleʼ.

Le koʼolel túunoʼ tiaʼalaj: Yuumtsil, jach taam le chʼeʼenaʼ, tsʼoʼoleʼ minaʼan a chʼóoy. ¿Tuʼux jeʼel a chʼaʼik le jaʼ ku tsʼáaik kuxtaloʼ?

Jesús túuneʼ tu núukajtiʼ: Wa ka wukʼik u jaʼi le chʼeʼenaʼ yaan a kaʼa ukʼajtal, baʼaleʼ le máax ku yukʼik le jaʼ kin tsʼáaikoʼ yaan u kuxtal utiaʼal mantatsʼ.

Le koʼolel túunoʼ tu núukajtiʼ: Yuumtsil ¡tsʼáaten le jaʼoʼ!, utiaʼal maʼ in kaʼa ukʼajtal yéetel utiaʼal maʼ in kaʼa suut chʼaʼa jaʼ.

Le koʼoleloʼ tu tuklaj jach tu jaajil táan u tʼaan Jesús tiʼ jaʼeʼ. Baʼaleʼ, letiʼeʼ táan u tʼaan tiʼ le jaajil ku taal tiʼ Dios yéetel tiʼ le reinooʼ. Le jaajil ku keʼetel yéetel jaʼoʼ jeʼel u tsʼáaik kuxtal minaʼan u xuuleʼ.

Ka tsʼoʼokeʼ Jesuseʼ tiaʼalaj tiʼe koʼoleloʼ: Xeen a tʼan a wíicham, tsʼoʼoleʼ ka suut wayeʼ.

Letiʼeʼ tu núukaj: Teneʼ minaʼan in wíicham.

Jesuseʼ tiaʼalaj: Jaajatʼaan, baʼaleʼ tsʼoʼok u yantal cinco u túulul a wíicham, le a wéet kajtal bejlaʼaʼ maʼ a wíichamiʼ.

Le koʼoleloʼ jaʼakʼ u yóol tumen jaaj le baʼax aʼalaʼabtiʼoʼ. ¿Bix úuchik u yojéeltik Jesús lelaʼ? Dios tsʼáaj u yojéelte, tumen letiʼe máax yéeyaʼan yéetel túuxtaʼan tumen Diosoʼ. Ka suunaj u j-kaambaloʼobeʼ jaʼakʼ u yóoloʼob ka tu yiloʼob táan u tsikbal Jesús yéetel utúul samaritana.

¿Baʼax k-kanik tiʼ lelaʼ? Ku kaʼansiktoʼoneʼ, Jesuseʼ u yaabilma tuláakal máak jeʼel bixak u chʼiʼibaleʼ. Toʼon xaneʼ kʼaʼabéet k-beetik jeʼex tu beetil Jesusoʼ. Letiʼeʼ u kʼáat ka ojéeltaʼak tumen tuláakal máak le jaajil ku tsʼáaik kuxtal minaʼan u xuuloʼ. Toʼon túuneʼ kʼaʼabéet k-áantik tuláakal máak u kʼaj óoltoʼob le jaajiloʼ.