Historia 90

Jesús caniʼné ti gunaa ruaa ti bizé

JESÚS cazilaʼdxiʼ gaxha de ti bizé ni nuu Samaria. Ca discípulo que zisícabe guendaró. Gunaa caniʼné Jesús ca la? zedandeebe nisa ndaaniʼ bizé ca. Jesús rabi laabe: Bisigaʼdeʼ naa caadxi nisa gueʼ.

Gunaa que guizáʼ ridxagayaa. Nannuʼ xiñee la? Purtiʼ Jesús judíu laa ne gunaa riʼ de guidxi Samaria laa. Stale de ca judíu ca qué riábadiʼ laacabe ca samaritanu ca. ¡Ninla riniʼnécabe laacaʼ! Peru Jesús nadxii guiráʼ binni. Jesús rábibe gunaa que: Pa lii ñannuʼ tuu nga canabaʼ lii nisa gueʼ la? lii ninabuʼ laabe, ne laabe nudiibe lii nisa ni rudii guendanabani.

Señor, na gunaa que, bizé riʼ nabé gueteʼ ni, ne lii cadi nédiluʼ ti cubeta. Paraa nga guidxeʼluʼ nisa rudii guendanabani ca yaʼ.

Pa gueʼluʼ nisa de bizé riʼ la? zátiluʼ nisa sti biaje, na Jesús rabi laabe. Peru de nisa ni naa zudiéʼ la? zanda gusibani ni binni ne qué ziuu dxi gati.

Señor, na gunaa que, ¡dané naa nisa ni nouʼ ca pue! Ti cadi chuʼ dxi gate nisa. Ne cadi chuʼ dxi guendaʼ ra bizé riʼ para cueʼ nisa.

Gunaa que zácaxa de que Jesús caníʼ de nisa ni reʼnu ca. Peru laabe ni caniʼbe nga de guiráʼ ni dxandíʼ de Dios ne reinu stiʼ, ni zeeda gaca casi nisa ni rudii guendanabani. Zanda gudii ni guendanabani ni qué zaluxe.

Jesús rabi gunaa que: Yetidxi xheeluʼ ti gueeduʼ.

Qué gápadiaʼ xheelaʼ, na gunaa que.

Jneza bicabuʼ na Jesús rabi laabe, peru maʼ gúpaluʼ gaayuʼ xheeluʼ ne ni nabezaneluʼ yanna riʼ la? cadi xheeluʼ laa.

Gunaa que guizáʼ ridxagayaa purtiʼ guiráʼ ni guníʼ Jesús que dxandíʼ cani. Ximodo nanna Jesús guiráʼ ndiʼ yaʼ. Dios gudxi ni laabe purtiʼ laabe nga ni Guníʼ Dios guseenda lu Guidxilayú. Yanna ca discípulo stiʼ Jesús ribiguétacaʼ ne ridxagayaacaʼ ora ruuyacaʼ Jesús caniʼné ti samaritana.

Xi rizíʼdinu de guiráʼ ndiʼ yaʼ. De que Jesús gúcabe nachaʼhuiʼ ne binni de sti guidxi. Laanu laca naquiiñeʼ gácanu zacá; cadi guiníʼ íquenu de que malu binni purtiʼ si de sti guidxi laa. Jesús racalaʼdxiʼ de que guiráʼ binni gunibiáʼ ni dxandíʼ ne ni ziné laacabe lu guendanabani ni qué zaluxe. Ne laanu naquiiñeʼ gacanenu binni guiziidiʼ de laani.

Juan 4:5-43; 17:3.