ADKINTUFINGE Jesu anüley tüfa mu. Petu kimelelfi kom tüfachi pu che mülelu Galilea fütra wingkul mu. Tañi pu inanieetew doy inafülmanieeyew. Kidu dulli (ngümintuy) mari epu fey engün tañi apostol ngeal. Tati pu apostol fey engün Jesu tañi sakiñ pu inanieetew. ¿Kimfimi iney pingey engün?

Wüne, Simon Pedro ka tañi peñi Andre. Feymew, müley Santiaw ka Juan, ka fey engu peñiwen. Kangelu apostol Santiaw ka pingey, ka müley kangelu Simon ka pingelu. Ka müley epu apostol mür Juda pingeyngu. Kiñe Juda Iskariote, kangelu Juda ka Tadeo pingey. Müley Felipe ka Natanael (ka Bartolomeo pingelu), ka müley Matew ka Toma.

Feymu dew wiñomelu ta Samaria mew, Jesu llituy ñi wüne amul dungual: ‘Tati reyno mülelu wenu mapu mu fülkülepay.’ ¿Kimimi chem ngen tüfachi reyno? Feyta Ngünechen ñi rüf ngünen. Jesu ta rey ngey. Kidu ngünenieay wenu mapu mu, ka küpalay tüngün dungu Mapu mu. Kom Mapu kiñe küme rumel mülewe ngetuay Ngünechen tañi reyno mu.

Tüfa mu Jesu petu kimeltufi pu che tüfachi reyno mu. ‘Femngechi llellipuaymün,’ pi kidu. ‘Taiñ Chaw Ngünechen wenu mapu mu mülelu, yamniengepe tami üy. Küpape tami reyno. Femngepe tami feypin Mapu mu, chumngechi ñi femken wenu mapu mu.’ Alün che feypikey üytukefi tüfachi llellipun ‘Ñidol ñi llellipun.’ Kakelu üytukefi, ‘Taiñ Chaw Ngünechen.’ ¿Feypiafuymi kom tüfachi llellipun?

Jesu ka kimelelfi ta che chumngechi müley tañi welukentu femal engün. ‘Femnge kakelu che tami ayükeel tami femngeal ta eymi,’ pi Jesu. ¿Ayüwkelaymi kakelu mi poyeetew? Feymew, müley taiñ küme che ngeal kake che engün mu. Kom femle tüfa ¡müna küme Mapu ngetuay ti küme rumel mülewe ngetule! ¿rüfngelay am?