JESÚS yar birgi siid, be dagge. Dulemar odurdagsii Galilea yar birgi. Walig bugmaladdina, e sabbingana. Geb 12 mergu wemar abargi susbali e apóstolmarga gumalaga. Apóstolmar, bamalad Jesúsba nanamaladbo wis aggarmala. ¿Be wisi igi nugmala?

Gebbegwad gine Simón Pedro, e gwenad Andrésbo. Degiidgi, Santiago geb Juanbo, wemar na gwenadganmoga. Baid apóstol, Santiagoye nugmogad, geb baiddi anba Simónye nugmoga. Apóstolmar warbo nugmala Judas. Wargwena Judas Iscariote, geb baid Judas dina, Tadeoye ese gormarbali. Anba Felipe, Natanaelbo (Bartolomeoye ese gorlebali), geb Mateode geb Tomásde.

Jesús Samariag gudii nonigua, sogde: ‘Babdummad reino nibneg ginedi iddagga gusa’. Aunni gebbe we ibmargi sunmade ¿be wisi we reino ibua? Babdummad e gobierno sunsoged obare. Jesús e reyg sigoedi. Nibneggi negdagmai guoe geb Nabbanegse negboogwad sedagoe. We reino, belagwable Nabbaneg gannar neg yeerdaglegedga imaggoe.

Jesús wegine emar odurdagsii reino igarsig. Emarga soge: ‘Weyob bemar Babdummad sega goloed: Anmar Bab nibneggi maidi, biddiggi be nug odummolesan gadina. Be reino be anmarse barmidage. Be soged bali Nabbaneggi ibmar gusan gadina, nibneggi gumaidyob’. We Babse goledi bilege ‘Padrenuestro’. ¿Be nabir bela nonog gasmogale?

Jesús anba emar odurdagsibali, igi dulemar nabo mudsubmudsub damaloe. Soge: ‘Igi dule bamalad be imagged be abege, deyobi dule baigan imagmogo’. ¿Dulemar beg ibmar nuegan imaggele be yeeriddodae? Degisundibe, dule baiganga ibmar nuegan anmar imagged abelemoga. ¡Ibiyob nued iddollegoe Nabbaneg yeerdaglegedgi bela dulemar na ega mudsubmudsub ibmar nuegan imaggarmalale! ¿insoa?