EMAÑAMI Jesús rehe oguapýrõ koʼápe. Omboʼehína koʼã hentekuérape peteĩ montáñape oĩva Galiléape. Umi ag̃uive oguapýva chugui haʼe idisipulokuéra. Umíva apytégui oiporavovaʼekue 12 kuimbaʼépe oiko hag̃ua chuguikuéra apóstol. Umi apóstol haʼe Jesús disípulo ojeporavopyrevaʼekue. Ndépa reikuaa mbaʼéichapa héra hikuái?

Haʼevaʼekue Simón Pedro ha iñermáno Andrés. Upe rire, Santiago ha Juan, haʼéva oñoermáno avei. Ótro apóstol héra avei Santiago, ha ótro katu Simón. Mokõi apóstol héra Judas. Peteĩ héra Judas Iscariote, ha pe ótro Judas oñehenóiva avei Tadeo. Oĩ avei Felipe ha Natanael (hérava avei Bartolomé), ha Mateo ha Tomás.

Ou rire Samáriagui, Jesús oñepyrũ opredika: ‘Pe rréino yvagapegua hiʼag̃uíma’. Ndépa reikuaa mbaʼépa upe rréino? Haʼe peteĩ goviérno añetegua oúva Ñandejáragui. Upépe Jesús haʼe rréi. Haʼe ogovernáta yvága guive ha oguerúta pyʼaguapy Yvy ape ári. Ñandejára rréino ojapóta ko Yvy tuichakuégui peteĩ paraíso.

Koʼápe Jesús omboʼehína pe rréinogui umi héntepe. ‘Kóicha peñemboʼevaʼerã’, heʼi. ‘Ore Ru yvágape reiméva, toñemombaʼeguasu nde réra. Tou ne rréino. Tojejapo ne volunta ko Yvy ape ári, yvagapeguáicha.’ Oĩ heta ohenóiva ko ñemboʼépe ‘Padrenuestro’. Ikatúpa nemanduʼapaite ko ñemboʼére?

Jesús omboʼe avei umi héntepe mbaʼéichapa oikovaʼerã oñondive. ‘Pejapo pende rapicháre peipotáva ojejapo penderehe’, heʼi. Ajépa nembovyʼa nde rapicha ivuénoramo nendive? Péicha, Jesús heʼi ñanevuenovaʼerãha ñande rapichakuéra ndive. Ajépa iporãitéta ko Yvy haʼe vove peteĩ paraíso ha enterove ojapo upéicha!