Kukwe kira 91

Jesús diribare ngudrebiti

JESÚS tä täkäni nete mike ñärärä. Tä kukwe driere nitre jökrä ie ngudrebiti kä Galilea känti. Nitre tä bäri ken ye nitre ja tötikaka ben. Niarakwe nitre dianinkä 12 ne kwe rabadre apóstol. Nitre apóstol ye nitre ütiäte ja tötikaka Jesukwe. ¿Niaratre kädekata ño gare mäi?

Kena, Simón Pedro bätä eteba Andrés. Biti Santigo aune Juan ja etebare arato. Apóstol mada kädekata Santiago arato, aune mada kädekata Simón arato. Apóstol nibu kädekata Judas. Iti Judas Iscariote, aune Judas mada ye kädekata Tadeo. Bätä Felipe aune Natanael (kädekata Bartolomé arato), bätä Mateo aune Tomás.

Jesús nämene Samaria nükaninta ye bitikäre, niarakwe kukwe drie ye kömikani kena: ‘Gobran kä kwinbätä ye nibira ja ken.’ ¿Gobran ye dre gärätä gare mäi? Ye gobran metre Ngöbökwe. Jesús ye rei kwe. Niarakwe gobrandi kä kwinbätä aune ni mikai nüne jäme kwe Kä tibienbätä. Gobran Ngöbökwe ye köböire Kä tibien jökrä sribei bä nuäre.

Nete Jesús tä blite gobran yebätä nitre ben. ‘Ne erere nikwe oradre,’ Jesús niebare. ‘Nun Rün kä kwinbätä, mä kä ye mikadre ütiäte. Gobran mäkwe jatadre. Mä töi ye erere rabadre bare Kä tibienbätä, tä nemen bare kä kwinbätä ye erere.’ Ni kwati tä orasion ne kädeke: ‘Orasion ni Dänkienkwe.’ Ni mada tä kädeke, ‘Padrenuestro.’ ¿Mä raba orasion ye niere täte?

Nitre ja ngwandre ño kwärikwäri ye Jesús tä driere ietre arato. ‘Dre nuaindre mäkrä ie mä tö ye erere mä nuain ni mada kräke,’ niebare kwe. Ni mada tä jondron kwin nuainne mäkrä ye tä nemen kwin mäkrä, ¿ñan ererea? Yebätä, nikwe ja töimikadre kwin nitre mada kräke. Kä bä nuäre yete nitre jökrä käkwe ye nuaindi, ¡ye abokän rabai kwin krubäte! ¿ñan ererea?

Mateo kapitulo 5-7; Mat. 10:1-4.