TAN-AWA si Jesus nga nagatudlo sa mga tao sa isa ka bukid sa Galilea. Malapit sa iya amo ang iya mga disipulo. Nagpili sia sa ila sing 12 agod mangin apostoles. Ang mga apostoles pinasahi nga mga disipulo ni Jesus. Kilala mo bala sila?

Yara si Simon Pedro kag ang iya utod nga si Andres. Nian yara si Santiago kag si Juan, nga mag-utod man. Yara man ang isa pa ka Santiago, kag isa pa nga ginatawag Simon. Duha ka apostoles ang may ngalan nga Judas: si Judas Iscariote, kag ang isa pa ka Judas (nga ginatawag man Tadeo). Nian yara si Felipe kag si Natanael (nga ginatawag man Bartolome), kag si Mateo kag si Tomas.

Sang makabalik gikan sa Samaria, nagbantala si Jesus: ‘Ang ginharian sang mga langit malapit na.’ Ang ginharian isa ka matuod nga pangulohan sang Dios. Si Jesus ang hari sini. Magagahom sia gikan sa langit sa pagdala sing paghidait kag himuon ang duta nga paraiso.

Nagasiling diri si Jesus: ‘Amo sini kamo magpangamuyo: Amay namon sa langit, padunggi ang imo ngalan. Pakariha ang imo ginharian. Himua ang imo kabubot-on sa duta, subong sang sa langit.’ Ginatawag ini ‘Pangamuyo sang Ginuo,’ ukon ‘Amay Namon.’

Gintudloan man ni Jesus ang mga tao nga magmalulo sa isa kag isa. ‘Himua sa iban ang luyag mo nga himuon nila sa imo,’ siling niya. Indi bala dalayawon sa paraiso nga duta, kon ang tanan maghimu sini?