KʼARU yook xbʼaanunkil li Jesus saʼ li tzuul re Galilea? Li Jesus yook chi xkʼutbʼal li yaal chiruhebʼ li qas qiitzʼin. Ut, ebʼ li winq li wankebʼ chi xkʼatq aʼanebʼ li 12 chi tzolom, li kixsikʼebʼ ru choʼq xʼapostol. Anihebʼ xkʼabʼaʼ li xtzolom li Jesus?

Laj Simon Pedro ut laj Andres riitzʼinebʼ ribʼ. Laj Santiago ut laj Juan, riitzʼinebʼ ajwiʼ ribʼ. Laj Santiago, laj Simon, laj Judas Iscariote ut wank jun chik laj Judas yeebʼil re Tadeo, laj Felipe, laj Natanael yeebʼil re Bartolomeo, laj Mateo ut laj Tomas. Aʼanebʼ li xkabʼlaju chi apostol li Jesus.

Naq li Jesus kiʼelk chaq saʼ li tenamit Samaria ut kiʼok xpuktesinkil li chaabʼil esilal, kixye: ‹Li Xnimajwal Awabʼejilal li choxa ak xnachʼok chaq›. Ma nakaanaw kʼaru li Awabʼejilal li kixye li Jesus? Aʼan li Xnimajwal Awabʼejilal li Yos. Li Jesus tjolominq saʼ choxa saʼ li Awabʼejilal aʼin ut tixkʼam chaq li tuqtuukilal saʼ Ruuchichʼochʼ. Chi joʼkan chixjunil li Ruuchichʼochʼ twulaq choʼq Sahilal Naʼajej.

Saʼ li tzuul aʼin, li Jesus kiʼaatinak chirix li Xnimajwal Awabʼejilal li Yos ut kixye: ‹Chi joʼkaʼin textijoq, at Qayuwaʼ li wankat saʼ choxa, santobʼresinbʼil taxaq laakʼabʼaʼ. Chichalq ta Laanimajwal Awabʼejilal. Chiʼuxq ta laawajom saʼ choxa ut saʼ Ruuchichʼochʼ›. Aʼin li tij li kixkʼut li Jesus. Ma nakaanaw chixjunil li tij aʼin?

Li Jesus kixkʼut ajwiʼ chanru tqakʼam qibʼ saʼ usilal ut kixye: ‹Chixjunil li teeraj naq teʼxbʼaanu eere, cheebʼaanuhaq ajwiʼ laaʼex rehebʼ aʼan›. Ma twulaq raj chiqu naq sa tooʼeʼril? Joʼkan naq, tento naq chaabʼilaqo rikʼinebʼ li qas qiitzʼin. Kʼajoʼaq xchʼinaʼusal naq chixjunilebʼ teʼxbʼaanu aʼin saʼ li Sahilal Naʼajej arin saʼ Ruuchichʼochʼ!