LEBAYA Yesu anikere hano. Anemukangirirya abandu abosi aba okwa kithwa e Galilaya. Abikere hakuhi nayu b’abigha biwe. Abirisombolha 12 omw’ibo eribya bakwenda. Abakwenda ni bigha ba Yesu abali mbaghane. Wunasi amena abu?

Hali Simoni Petero na mughalha wabu Anderea. Ihathasyabya Yakobo na mughalha wabu ya Yoane. N’oghundi mukwenda nayu akahulhawa mwa Yakobo, n’oghundi akahulhawa mwa Simoni. Abakwenda babiri bakahulhawa mwa Yuda. Omughuma ni Yuda Iskariota, n’oghundi Yuda nayu akahulhawa omwa Tadeo. Neryo ihabya Filipo na Natanaeli (kutse Bartolomayo), na Matayo na Toma.

Abere abirilhua e Samaria, Yesu mwatsuka erikangirirya omurundi w’erimbere athi: ‘Obwami bw’elhubulha buli hakuhi.’ Wunasi obwami obo nga niki? Ni buthabali hene-hene obwa Nyamuhanga. Yesu ya mwami wabwo. Akendi syathabalha inyane elhubulha n’eriletha obuholho okwa kihugho. Obwami bwa Nyamuhanga bwa syakolha ekihugho kyosi mwa Paradiso eyuwene.

Yesu ane hano akakangirirya abandu b’okw’obwami. Akasoborera athi: ‘Kwa musabe muthya. Thatha wethu oyuli elhubulha, erina lyawu lisikibawe. Obwami bwawu bwase. Erisonda lyawu lighirawe okwa kihugho, ngokwa liri elhubulha.’ Abangi bakahulhawo ‘mw’Omusabe w’Omukama wethu.’ Abandi ibahulhawo mwa ‘Thatha Wethu.’ Wangana thondogholha omusabe owosi?

Yesu kandi ane mukangiriraya abandu ngokwa bangabya n’abandi. Akabugha athi: ‘Wukolere abandi ebya wanzire ibo ibakukolera.’ Siwulianza omughulhu abandi baka kukolha ndeke? Busana n’ekyo, Yesu akabugha athi thutholere ithwathwalha abandi bandu ba ndeke. Sikyendi syabya kibuya omwa kihugho kye paradiso omughulhu obuli mundu asyakolha athya?