Icisimicisyo 91: BaYesu Basambisya pa Lupili
BONA baYesu balikele apa. Balukusambisya bonse aba bantu pa lupili mu Galili. Abo abekele apepi nabo basambile babo. Basalululamo pali bo abali 12 ukuba intangisi. Intangisi basambile abalibelele aba baYesu. Kani ulibesi amasina abo?
Kuli Simoni Petilo na Andaleya umukwabo. Eli kuli Jakobo na Yoane, aba nabo bana bankasi. Naimbi nayo intangisi ililicilwe ati Jakobo, naimbi nayo iletwa ati Simoni. Intangisi sibili sililicilwe ati Juda. Imo ni Juda Isikaliote, kabili na woyo umbi Juda aletwa nakabili ati Tadayo. Eli kuli Filipo na Natanyeli (uwitwa nakabili ati Batolomayo), na Matayo na Tomasi.
Panuma ya kubwela ukufuma ku Samalya, baYesu balitatikile ukutulisya umuku wa kutanga ati: ‘Ubufumu bwa kwiulu bwapalamina.’ Kani webo ulibwisi ubo bufumu? Bufumu bwa baLesa ubwa cinenene. BaYesu e mfumu ya buko. Bakateka ukufuma kwiulu kabili bakaleta ubutende pa calo. Ubufumu bwa baLesa bukaalula icalo conse ukuba paladaiso iyakuti ubune.
BaYesu apa balukusambisya abantu pa bufumu. Balukulondolola ati: ‘Ifi efi mwelelwe ukutembela. Mwe baWisifwe aba kwiulu, isina lyenu licindikwe. Ubufumu bwenu bwise. Ukufwaya kwenu kucitwe pa calo, koti ni kwiulu.’ Abantu abengi balalita ati ‘Itembelo lya baSikulu.’ Bambi nabo balalita ati ‘Mwe baWisifwe.’ Kani ungalilabila lyonse itembelo?
BaYesu nakabili balukusambisya abantu ifibelelwe ukucita ku babyabo. Balabila ati: ‘Mulukubacitila abantu bambi fyopele’fyo ifi mulukufwaya bo ati bamucitileni.’ Tali mwebo mulatemwa kani bambi bamucitileni ifya luse? Popele, baYesu balukulabila ati, tulyelelwe ukucito’luse ku bantu bambi. Tali cikabe’ciweme mu paladaiso pa calo ili umuntu onse akacite’fi?
Matayo ifyapitala 5 ukufika ku 7; 10:1-4.
Ifyakwipusya
- Mu cikope, nipi baYesu balukusambisya, kabili nibani abo abekele apepi nabo?
- Mba intangisi 12 nibani amasina?
- Mba nibwisa Ubufumu baYesu balukutulisya?
- Mba findo baYesu basambisya abantu ukutembelelapo?
- Mba findo baYesu balabilapo pafi abantu belelwe ukucita ku babyabo?
Ifyakwipusya na fimbi
- Pendeni Matayo 5:1-12.
Nimuli sisa’nsila tungalangisya ukweba’ti tulafwaisya ifya ku mupasi? (Mat. 5:3; Loma. 10:13-15; 1 Tim. 4:13, 15, 16)
- Pendeni Matayo 5:21-26.
Kani Matayo 5:23, 24 alakonkomesyapo syani pakweba’ti bucibusa bwesu ne bakwasu ne nkasi bulakumako kuli bucibusa bwesu na baYehoba? (Mat. 6:14, 15; Amasa. 133:1; Kolo. 3:13; 1 Yoa. 4:20)
- Pendeni Matayo 6:1-8.
Mba nifisa fimo fimo ifi abaKlistu belelwe ukucicila ifingalangisya ukweba’ti balalilungika abene benka? (Luku 18:11, 12; 1 Kol. 4:6, 7; 2 Kol. 9:7)
- Pendeni Matayo 6:25-34.
Kani findo baYesu basambiisye pa ficibelele icicindeme ukucetekela muli baYehoba ukweba’ti bakatupela ifi tufwaisya ifya ku munefu? (Fum. 16:4; Amasa. 37:25; Filip. 4:6)
- Pendeni Matayo 7:1-11.
Kani icakupalanya icilembelwe pali Matayo 7:5 cilatusambisye’ndo? (Ifisi.26:12; Loma. 2:1; 14:10; Jako. 4:11, 12)
