ພະເຍຊູສັ່ງສອນເທິງພູເຂົາ
ບົດ 91
ພະເຍຊູສັ່ງສອນເທິງພູເຂົາ
ເບິ່ງພະເຍຊູນັ່ງທີ່ນີ້ແດ່. ພະອົງພວມສັ່ງສອນຄົນທັງໝົດເຫຼົ່ານີ້ເທິງພູເຂົາໃນແຂວງຄາລີເລ. ຄົນເຫຼົ່ານັ້ນທີ່ນັ່ງໃກ້ພະອົງແມ່ນພວກສາວົກຂອງພະອົງ. ພະອົງໄດ້ເລືອກເອົາ 12 ຄົນໃນພວກເຂົາໃຫ້ເປັນອັກຄະສາວົກ. ພວກອັກຄະສາວົກເປັນສາວົກພິເສດຂອງພະເຍຊູ. ເຈົ້າຮູ້ຊື່ຂອງເຂົາບໍ?
ມີຊີໂມນເປໂຕແລະອັນດະເລອານ້ອງຊາຍຂອງເຂົາ. ແລ້ວມີຍາໂກໂບແລະໂຍຮັນຜູ້ທີ່ເປັນອ້າຍນ້ອງກັນດ້ວຍ. ອັກຄະສາວົກອີກຄົນນຶ່ງຊື່ວ່າຍາໂກໂບ ແລະອີກຄົນນຶ່ງມີຊື່ວ່າຊີໂມນ. ອັກຄະສາວົກສອງຄົນມີຊື່ຢູດາ. ຜູ້ນຶ່ງຊື່ຢູດາອີດສະກາລີໂອດ ແລະຢູດາອີກຄົນນຶ່ງມີຊື່ອີກວ່າຕາເດ. ແລ້ວກໍ່ມີຟີລິບແລະນະທານາເອນ (ຊຶ່ງມີຊື່ວ່າບາເທເລມີ) ມັດທາຍແລະໂທມາ.
ພາຍຫຼັງທີ່ກັບມາຈາກສະມາລີ ພະເຍຊູເລີ່ມປະກາດເປັນເທື່ອທຳອິດວ່າ: ‘ລາຊະອານາຈັກຝ່າຍສະຫວັນມາໃກ້ແລ້ວ.’ ເຈົ້າຮູ້ບໍວ່າລາຊະອານາຈັກນັ້ນຄືຫຍັງ? ນັ້ນຄືລັດຖະບານອັນແທ້ຈິງຂອງພະເຈົ້າ. ພະເຍຊູເປັນກະສັດແຫ່ງລັດຖະບານນັ້ນ. ພະອົງຈະປົກຄອງຈາກສະຫວັນແລະຈະນຳສັນຕິສຸກມາສູ່ແຜ່ນດິນໂລກ. ລາຊະອານາຈັກຂອງພະເຈົ້າຈະເຮັດໃຫ້ແຜ່ນດິນໂລກທັງສິ້ນເປັນອຸດທະຍານອັນສວຍງາມ.
ທີ່ນີ້ພະເຍຊູພວມສັ່ງສອນຜູ້ຄົນກ່ຽວກັບລາຊະອານາຈັກນັ້ນ. ພະອົງອະທິບາຍວ່າ: ‘ທ່ານທັງຫຼາຍຄວນອະທິດຖານຕາມຢ່າງນີ້ ພະບິດາຂອງຂ້າພະເຈົ້າທັງຫຼາຍຜູ້ຢູ່ໃນສະຫວັນ. ຂໍໃຫ້ນາມຊື່ຂອງພະອົງເປັນທີ່ນັບຖື ຂໍໃຫ້ລາຊະອານາຈັກຂອງພະອົງມາຕັ້ງຢູ່. ນ້ຳພະໄທຂອງພະອົງສຳເລັດໃນສະຫວັນຢ່າງໃດ ຂໍໃຫ້ສຳເລັດທີ່ແຜ່ນດິນໂລກຢ່າງນັ້ນ.’ ມີຫຼາຍຄົນເອີ້ນຄຳອະທິດຖານນີ້ວ່າ: ‘ຄຳອະທິດຖານຂອງອົງພະຜູ້ເປັນເຈົ້າ’ ເຈົ້າຈະກ່າວຄຳອະທິດຖານນີ້ທັງໝົດໄດ້ບໍ?
ພະເຍຊູພວມສັ່ງສອນຜູ້ຄົນເຖິງວິທີທີ່ເຂົາຄວນປະຕິບັດຕໍ່ກັນແລະກັນດ້ວຍ. ພະອົງບອກວ່າ: ‘ທ່ານທັງຫຼາຍຢາກໃຫ້ຄົນອື່ນເຮັດສິ່ງໃດແກ່ທ່ານ ທ່ານຈົ່ງເຮັດສິ່ງນັ້ນແກ່ເຂົາ.’ ເຈົ້າພໍໃຈບໍ່ແມ່ນບໍເມື່ອຄົນອື່ນເຮັດກັບເຈົ້າຢ່າງກະລຸນາ? ດັ່ງນັ້ນພະເຍຊູຈຶ່ງບອກວ່າ ເຮົາຄວນເຮັດກັບຄົນອື່ນດ້ວຍໃຈກະລຸນາ. ອຸດທະຍານເທິງແຜ່ນດິນໂລກຈະເປັນທີ່ໜ້າຢູ່ຫຼາຍປານໃດເມື່ອທຸກຄົນເຮັດຈັ່ງຊີ້?
ມັດທາຍ ບົດ 5 ເຖິງ 7; 10:1-4.
