LU Jesús qʼuqli tzalu. In nchi kubʼ t-xnaqʼtzaʼn xjal twi jun witz te Galilea. Aqeju ateʼk ttxlaj aʼyetzun t-xnaqʼtzbʼenjo. O chi jaw tskʼoʼn 12 kyxol qeju lepchiqeʼk tiʼj tuʼn kyok te t-apóstol. Aqeju apóstol aʼyetzun t-xnaqʼtzbʼen Jesúsju nim kyoklen. ¿Bʼiʼn tuʼna tiʼ kybʼi?

Aju tnejil, Simón Pedro tukʼex Andrés aju terman. Ex Santiago tukʼex Juan, ax kyerman kyibʼ. Aju juntl apóstol ax ikx Santiago tbʼi, ax ikx Simón tbʼi juntl apóstol. Judas kybʼi kabʼetl. Jun Judas Iscariote ex juntl Judas Tadeo. Ax ikx Felipe ex Natanael (ax ikx Bartolomé tbʼi), tukʼex Mateo ex Tomás.

Tej tmeltzʼaj Jesús tuj Samaria, ok ten Jesús tnejil maj pakbʼal toj Galilea ex tqʼama: «Aju kawbʼil in tzaj tuj kyaʼj ma tzul laqʼeʼ». ¿Nel tnikʼa alkyeju kawbʼil lu? Atzun tkawbʼil Diosju. A Jesús kkawil toj kawbʼil lu. Tzmax toj kyaʼj kkawil ex ktzajel tiʼn mojbʼabʼil twitz Txʼotxʼ. Tkyaqil twitz Txʼotxʼ kʼokel te jun tbʼanel najbʼil te tzalajbʼil tuʼn tkawbʼil Dios.

Nchi kubʼ t-xnaqʼtzaʼn Jesús xjal tzalu tiʼj tkawbʼil Dios. Xi tqʼamaʼn kye tuʼn kynaʼn Dios kyjalu: ‹Aya qMan Dios, ata toj kyaʼj, xjanwt tzʼok tbʼiya. Noqwit kuʼtzju tkawbʼila. Bʼant-xwit tajbʼila tuj kyaʼj, ax ikx tzalu twitz txʼotxʼ›. Atzun jun piẍ naʼj Dios jlu tiʼj naʼj Dios kyaj t-xnaqʼtzaʼn Jesús. ¿Jaku tzaj tqʼamaʼna tkyaqil naʼj Dios lu?

Ax ikx nchi kubʼ t-xnaqʼtzaʼn Jesús tzeʼn kymod xjal ktel kyxol, tqʼama kyjalu: ‹Tkyaqilju kyajbʼile tuʼn kybʼinchante xjal kyeye, ax ikxtzun kybʼinchame kye›. ¿Tzeʼn nela toj twitza qa bʼaʼn jun xjal tukʼila? Tuʼntzunju, iltiʼj tuʼn qok te tbʼanel kyukʼe txqantl xjal. ¡Tbʼanel kʼokel twitz Txʼotxʼ aj tkubʼ kybʼinchan kykyaqil xjal jlu!