KOTO nu̱ú yuku̱ ñuu Galilea yóʼo níndúʼu ta̱ Jesús sánáʼa̱ra na̱ yiví. Na̱ ndóo yatin xíʼinra yóʼo kúú na̱ discípulo. Ta 12 kúú na̱ nda̱ka̱xinra koo apóstol. Na̱yóʼo kúú na̱ xíka ni̱ʼi xíʼinra. ¿Á xíni̱ún nda̱saa nanína?

Ta̱ nu̱ú kúú ta̱ Simón Pedro xíʼin ñanira ta̱ Andrés. Saátu nda̱ka̱xinra ta̱ Santiago xíʼin ñanira ta̱ naní Juan. Íyotu inka ta̱ apóstol naní Santiago ta íyotu inkara naní Simón. U̱vi̱ na̱ apóstol naní Judas. Iinra naní Judas Iscariote, ta̱ inka Judas nanítura Tadeo. Saátu nda̱ka̱xinra ta̱ Natanael ta̱yóʼo nanítura Bartolomé, ta nda̱ka̱xinra ta̱ Felipe, ta̱ Mateo xíʼin ta̱ Tomás.

Tándi̱ʼi nda̱ndikó ta̱ Jesús ñuu Samaria, kán kúú nu̱ú siʼna ki̱xaʼára káʼa̱nra: ʼXa̱kuyatin ki̱vi̱ ña̱ kaʼndachíñu ta̱ rey nda̱ka̱xin Ndióxi̱ʼ. ¿Á xíni̱ún ndáaña kúni̱ kachi ña̱yóʼo? Ña̱yóʼo kúni̱ kachiña Ndióxi̱ nda̱ka̱xinra ta̱ Jesús ña̱ kuura rey, ta chí ndiví kaʼndachíñura tasaá kundoo va̱ʼayó nu̱ú Ñuʼú yóʼo.

Yóʼo níndúʼu ta̱ Jesús sánáʼa̱ra na̱ yiví xa̱ʼa ta̱ rey nda̱ka̱xin Ndióxi̱. ʼÑa̱yóʼo ka̱ʼa̱nndó xíʼin Ndióxi̱ʼ káchira xíʼinna. ʼYivándi̱ ta̱ íyo chí ndiví, ndasayi̱i̱ ki̱vi̱ún. Ná kixa̱a̱ ki̱vi̱ kaʼndachíñún nu̱úndi̱. Ta ná koo ña̱ kúni̱ miíún, nda̱a̱ tá íyo chí ndiví, saátu ná koo nu̱ú Ñuʼú yóʼoʼ. Ku̱a̱ʼání na̱ yiví káʼa̱nna ʼPadrenuestroʼ xíʼinña. ¿Á xíni̱ún ka̱ʼún ña̱ Padrenuestro yóʼo?

Sa̱náʼa̱tu ta̱ Jesús na̱ yiví ndáaña keʼéna ña̱ vií koo inina xíʼin táʼanna. ʼVií koo inindó xíʼin inkana tá kúni̱ndó vií koo inina xíʼinndóʼ, káchira xíʼinna. ¿Á kúsi̱í-iniún tá vií íyo ini inkana xíʼún? Xa̱ʼa ña̱yóʼo xíniñúʼu vií koo iniyó xíʼin inkana. Livikaví koo ñuyǐví xa̱á chi kán ndiʼina keʼé ña̱yóʼo.