TALA Yesu ou na tumama aha. Ali na ku longesa vantu vose ava ha muncinda ua ku Ngalileya. Vaze va na tumama ku hiehi cikuma neni, vakevo vandongesi veni. Na hangulaho vamo va ku pua 12, linga va pue vapostolo veni. Ua tantekeya mazina avo ni?

Hali Simone Petulu na muanaye Anduleo. Hali Tiango na Yoano, navo va pua va ntsongo na mukuluntu. Hali kapostolo mukuavo naua lizina lieni Tiango kaha hali naua Simone mukuavo. Hali naua, Yunda i va luka naua nguavo Tandeo. Kaha hali naua Yundasa Iskaliota. Kaha hali Filipu na Natanele ( i va luka naua nguavo Mbatolomeo), na Mateo na Tomasi.

Yesu mua hilukile ku Samaliya, ua putukile kuambulula ngueni: ‘Vuangana vua muilu vuli mu hiehi’. Ua tantekeya vika vua lomboloka ovu vuangana? Vua pua mpundu nguvulu ya Njambi. Yesu ikeye muangana uavuo. Aka sikila muilu vunoni aka neha ciyulo ha mavu. Vuangana vua Njambi vu ka alulula mavu ose na ku a puisa palandaizi ya cili.

Yesu ua kele na ku longesa ava vantu via vuangana vua Njambi. Ua va longesele ngueni mua pande ku vundila ngecize: ‘Tatetu u li muilu va lelese lizina liove. Vuangana vuove vu ize. Cizango cove va ci linge ha mavu ngue muilu’. Eci civundilo, vantu va vengi va ci luka nguavo ‘Civundilo ca Muangana’. Vamo nguavo civundilo ca ‘Tatetu’. U hasa ku tumbula mezi ose a eci civundilo, ni?

Yesu ua kele na ku longesa naua vantu vati va pandele ku yoya na vakuavo. Ua va lekele ngueni: ‘Lingilenu vakuenu vize vi mua lema ku mi lingila’. Vati ue ku ivua ku mutima nga vantu va ku vuila ngozi? Ngeci mukemuo, Yesu ua handekele ngueni tua pande ku vuila vakuetu ngozi. Ci ka pua ca cili mu palandaizi omo vantu vose va ka li vuila ngozi umo na mukuavo, ni vati?