Tanojnots 91

Jesús tamachtij talkuatipan

XIKITA Jesús nikan tokotsyetok. Uan kinimachtijtok nochin taltikpakneminij talkuatipan tein moajsi Galilea. Tein okachi achka yetokej, yejuan imomachtijkauan. Yej kinijitak 12 maj mochiuanij itatitaniluan. Tatitanilmej katkaj imomachtijkauan Jesús tein okachi iuan nenkej. ¿Tikmati keniuj motokaytijkej?

Yetoya Simón Pedro uan ikniuj Andrés. Ompa, Jacobo (Santiago) uan Juan tein no katkaj iknimej. Okse tatitanil no motokaytij Jacobo, uan okse no motokaytij Simón. Ome tatitanilmej motokaytijkej Judas. Se katka Judas Iscariote, uan okse Judas (Lebeo) tein no motokaytij Tadeo. No yetoya Felipe uan Natanael (tein no motokaytij Bartolomé), Mateo uan Tomás.

Keman Jesús kisak Samaria uan moajsia Galilea, kipeualtij yekinika itanojnotsalis: ‘Iluikak tekiuajyot amo uejka yetok’. ¿Tikmati toni nejon tekiuajyot? Yejua tein melauak itaixyekanalis Dios, uan Jesús yejua tekiuaj. Yej tekiuajtis iluikak uan kiualkuis yekyetolis nikan Taltikpak. Itekiuajyo Dios kichiuas se xochital semanauak Taltikpak.

Jesús kinimachtij taltikpakneminij ika itekiuajyo Dios. No kiniluij: ‘Ijkon xikchiuakan netataujtil. Totajtsin tein tiyetok iluikak, maj moueyitali motokay. Maj uiki motekiuajyo. Maj mochiua tein tej tikuelita, kemej iluikak no ijkon nikan Taltikpak’. Miakej taltikpakneminij kitokaytiaj ‘Netataujtil tein technextilij toTekotsin’. Oksekin, ‘Padrenuestro’. ¿Ueli tikijtoua nochi netataujtil?

Jesús no kininextilij taltikpakneminij keniuj monekia mouikaskej se iuan okse. Kiniluij: ‘Xikinchiuili oksekin tein tikneki maj mitschiuilikan’. ¿Melauj ika tikuelita maj mochiuakan yolkualmej mouan? Yejika, moneki timochiuaskej tiyolkualmej imiuan oksekin. ¡Melauj ika tel kualtsin eski keman itech xochital nikan Taltikpak nochin kichiuaskej tein kuali!

Mateo capítulos 5–7; 10:1-4.