Ekitebyo 91

Yesu Okwegyesa ari aha Rushozi

REEBA Yesu ashutami aha. Naayegyesa aba bantu boona abari aha rushozi omuri Galilaaya. Abo abamuhikire haihi n’abeegi be. Atooraine 12 ahari bo okuba entumwa ze. Entumwa n’abeegi ba Yesu ab’omutaano. Noomanya amaziina gaabo?

Hariho Simooni Petero n’omurumuna Anderea. Kandi hariho Yakobo na Yohaana nabo enyineemwe. Endiijo ntumwa ni Yakobo, n’ondiijo nawe ni Simooni. Entumwa ibiri nibeetwa ba Yuda. Omwe ni Yuda Iskaryota, kandi ondiijo ni Yuda orikwetwa Tadaayo. Kandi hariho Filipo na Nasanaeli (kandi orikwetwa Batolomayo), na Matayo na Tomasi.

Bwanyima y’okuruga Samaria, Yesu akatandika kubuurira omurundi gw’okubanza: ‘Obukama bwa Ruhanga buri haihi.’ Obukama obwo nobumanya? N’obutegyeki bwa Ruhanga obwa buzima. Yesu niwe mugabe waabwo. Naija kutegyekyera omu iguru kandi areete obusingye omu nsi. Obukama bwa Ruhanga nibwija kuhindura ensi yoona ekibanja kya Ruhanga ekirungi munonga.

Yesu aho ariyo naayegyesa abantu ebirikukwata aha bukama bwa Ruhanga. Ariyo naashoborora ati: ‘Oku nikwo mushemereire kushaba. Tataitwe ow’omu iguru, eiziina ryawe ryezibwe. Obukama bwawe bwije. Ebi okunda bikorwe omu nsi, nk’oku bikorwa omu iguru.’ Abantu baingi egi nibagyeta ‘Eshaara ya Mukama waitu.’ Abandi nibagyeta eshaara ya ‘Tataitwe.’ Noobaasa kugamba egi shaara yoona?

Yesu kandi ariyo naayegyesa abantu oku bashemereire kutwaza bataahi baabo. Yaabagira ati: ‘Korera abandi ebi orikwenda ngu bo bakukorere.’ iwe torikukikunda abandi ku barikukutwaza omu muringo gw’embabazi? N’ahabw’ekyo, Yesu ariyo naagira ngu, tushemereire kutwaza abandi n’embabazi. Omu kibanja kya Ruhanga, tikiraije kuba nikishemeza obu buri muntu weena ariba naakora eki?

Matayo eshuura 5 okuhika 7; 10:1-4.