MIRA Hesus sintá ei. E ta siñando tur e hendenan ei riba un seru na Galilea. Esnan sintá mas serka di dje ta su disipelnan. El a skohe 12 di nan pa bira apòstel. E apòstelnan tabata disipelnan spesial di Hesus. Bo sa nan nòmber?

Tin Simon Pedro i su ruman Andres. Anto tin Santiago i Juan, ku tambe ta ruman di otro. Tin un otro apòstel mas ku yama Santiago, i un otro mas ku yama Simon. Tin dos apòstel ku yama Hudas. Un ta Hudas Iskariot, i e otro Hudas ta ser yamá Tadeo tambe. Anto tin Felipe i Natanael (tambe yamá Bartolomeo), i Mateo i Tomas.

Despues di a bolbe for di Samaria, Hesus a kuminsá prediká pa promé bes ku ‘e reino di shelu ta serka.’ Bo sa kiko e reino ei ta? Esei ta un berdadero gobièrnu di Dios. Hesus ta su rei. Lo e reina for di shelu i trese pas riba tera. Henter e tera lo bira un paradeis bunita bou di e reino di Dios.

Aki Hesus ta siñando e hendenan tokante e reino. E ta splika nan: ‘Hasi orashon asin’aki: Nos tata ku ta den shelu, santifiká sea bo nòmber. Laga bo reino bini. Laga bo boluntat ser kumplí riba tera, meskos ku den shelu.’ Hopi hende ta yama esaki e ‘Orashon di Nos Tata.’ Bo por bisa henter e orashon?

Tambe Hesus a siña e hendenan kon nan tin ku trata otro. El a bisa: ‘Hasi ku otro meskos ku bo ke pa nan hasi ku bo.’ Bo no ta gusta pa otronan trata bo ku bondat? Pues, Hesus a bisa, nos tin ku trata otro hende ku bondat. Lo no ta maravioso ora tur hende ta hasi esei den paradeis riba tera?

Mateo kapítulo 5 te ku 7; 10:1-4.