QAWAY chaypi Jesusqa tiyakuchkan. Chaypim chay runakunata Galilea law orqopi yachachichkan. Paypa ladonpi kaqkunaqa discipulonkunam. Paykunamantam 12 akllarurqa apostolninkuna kanankupaq. Apostolkunaqa Jesuspa sapaqchasqan qatiqninkunam. ¿Yachankichu apostolkunapa sutinta?

Punta qayasqanqa karqa Simon Pedro wawqentin Andres. Chaymanta qayarqa wawqepuralla Jacobota chaynataq Juantapas. Huknin apostolninpas Jacobo sutiyoqmi karqa, hukninñataqmi Simon sutiyoqpas karqa. Chaymantapas huknin apostolninpa sutinqa karqa Judas Iscariote, hukkaqninpa sutinñataqmi karqa Tadeo. Hinaptinpas wakin apostolninpa sutinqa karqa Felipe, Natanael (paypa huknin sutinmi karqa Bartolome), chaymanta Mateo hinaspa Tomas.

Samaria lawmanta kutiramuspanña Jesusqa willakuyta qallarirqa kaynata nistin: ‘Diospa munaychakunanmi hichparamunña’ nispa. ¿Yachankichu imataq chay munaychakusqan kasqanta? Diospa gobiernonmi. Chay gobiernopa reyninqa Jesusmi kanqa. Hinaptinmi hanaq pachamanta gobiernamuptin Allpapi runakunaqa hawkallañam kawsakunqaku. Diospa munaychakusqanmi Allpa pachataqa paraiso hinata tikrachinqa.

Kay qawasqayki dibujopiqa runakunatam Jesusqa Diospa munaychakusqanmantam yachachichkan kaynata nispa: ‘Qamkunaqa kaynatayá mañakuychik: Hanaq pachapi Taytayku, sutiki yupaychasqa kachun, munaychakusqayki hamuchun. Munasqaykiyá rurasqa kachun kay Pachapipas hanaq pachapi hina’ nispa. Achka runakunam kay mañakuytaqa reqsinku ‘Yayayku’ nispa. ¿Yacharuwaqchu imatam llapanpi nisqanta?

Chaymantapas Jesusqa runakunata yachachichkanmi imaynatam runamasinkuwan kanankuta. Chaymi nirqa: ‘Qampaq imakuna ruranankuta munaspaqa qampas paykunapaqyá chaynata ruray’ nispa. ¿Manachu kusikunki wakinkuna kuyapayarikustin imatapas rurapusuptiki? Chaynallamá, ñoqanchikpas kuyapayakuq kananchikqa. ¡Ima sumaqchá kanqa Allpapi paraiso kaspan llapallanku chaynallata ruraptinkuqa! ¿aw?