Tantara 91

Nampianatse Tamy Vohitse teo Jesosy

MIPETRAKE Jesosy amy sary io. Mampianatse olo iaby reo tamy vohitse Galilia teo ie. Mpianatsine aze mipetrake marìny aze reo. Nifìly apostoly 12 Jesosy. Mpianatsin’i Jesosy miavake apostoly zao. Hainao va ty anaran-droze?

Tao Simona Petera noho Andrea rahalahine. Tao kea Jakoba noho Jaona, mpirahalahy kea reo. Ty hafa nana anara hoe: Jakoba noho Simona. Nisy apostoly roe samby nokaìhy hoe Jodasy: Jodasy Iskariota ty raike voho Jodasy raike iny natao hoe Tadeo. Bakeo Filipo noho Natanaela (na Bartolomeo). Tao kea Tomasy noho Matio.

Laha fa tafimpòly baka a-Samaria ane Jesosy, le nanomboke nitory voalohane ie hoe: ‘Fa marìny ty fanjakà’ty lanitse.’ Hainao va hoe ino fanjakà io? Fitondrà-mpanjakà-Ndranahare raha io. Jesosy ro ho mpanjaka ao. Hanjaka an-danitse ane ie, ka handay fiadàna an-tany etoy. Laha fa avy fanjakà-Ndranahare io, le hatao paradisa ty tany manontolo.

Mampianatse ty olo mikasike fanjakà io Jesosy amy sary eto. Hoy ty fanazavàne: ‘Ho’zao ro tokone hatao laha fa mivavake: Rainay an-danitse ane, hohamasìny ty anaranao. Angatahinay ho avy ty fanjakànao. Hatao an-tany etoy ty sitrapònao manahake ty fa anaòva aze an-danitse ane.’ Maro ty olo mikaike vavake io hoe ‘Vavake Nampianarin’i Tompo.’ Ty hafa kea mikaike aze hoe ‘Rainay.’ Hainao zisiky am-parane va vavake io?

Nampianatse ty olo ty fomba hifampikasòha amin’olo hafa kea Jesosy. Hoy ty asane: ‘Ataovo amin’olo ze raha teanareo hataon’olo aminareo.’ Tsy teanao va laha misy olo soa fanahy aminao? Ka tokone ho soa fanahy amin’olo manahake zay kea tsika hoy ty asan’i Jesosy. Tsy ho soasoa va laha manao ho’zay iaby ty kila olo amy paradisa ao?

Matio toko faha-5 zisiky amy toko faha-7; 10:1-4.