LUKU fa Yesus sidon dya. A e leri ala den sma disi na tapu wan bergi na Galilea. Den sma di sidon moro krosibei fu en, na en disipel. A ben teki 12 fu den fu de apostel. Den apostel na Yesus spesrutu disipel. Yu sabi fa den nen?

Yu abi Simon Petrus nanga en brada Andreas. Dan yu abi Yakobus nanga Yohanes, di de brada tu. Wan tra apostel de tu, di nen Yakobus èn wan trawan den e kari Simon tu. Tu apostel nen Yudas. A wan fu den na Yudas Iskariot, èn a tra Yudas den e kari Tadeyus. Dan yu abi ete Filipus nanga Natanael (di den e kari Bartolomeyus tu), èn te fu kaba Mateyus nanga Tomas.

Baka di Yesus drai kon fu Samaria, a e bigin fu preiki fu a fosi tron, taki: ’A kownukondre fu hemel kon krosibei.’ Yu sabi san na a kownukondre dati? Na wan trutru tiri fu Gado. Yesus na a kownu fu a tiri dati. A sa tiri komoto na hemel èn tyari vrede kon na grontapu. Na a Kownukondre fu Gado sa meki heri grontapu tron wan paradijs.

Yesus e leri den sma dya fu a Kownukondre. ’Un musu begi so’, a e tyari kon na krin. ’Wi Tata na hemel, yu nen musu kon santa. Yu kownukondre musu kon. Yu wani musu pasa na grontapu soleki na hemel.’ Furu sma e kari disi a ’Wi Tata Begi’. Yu sabi a heri begi?

Yesus e leri den sma tu fa den musu libi nanga makandra. ’Du sani gi tra sma san yu wani den musu du gi yu’, a e taki. Yu no e feni en wan moi sani te tra sma e sori yu switifasi? Dati meki Yesus e taki, dati wi musu sori tra sma switifasi. A no sa de wan tumusi moi sani efu ala sma sa du disi na ini a Paradijs na grontapu?