WONA Yesu wakhala pasi apa. Wakusambizga ŵanthu wose aŵa pa phiri mu Galileya. Awo ŵakhala kufupi comene na iyo mbasambiri ŵake. Wasankha ŵanalume 12 aŵa kuti ŵaŵe ŵapositole ŵake. Ŵapositole mbasambiri ŵapadera ŵa Yesu. Kasi mazina ghawo ukughamanya?

Pali Simone Petrosi na munung’una wake Andireya. Ndiposo pali Yakobe na Yohane, awoso mphaukuru na paunung’una. Paliso mpositole munyake uyo zina lake ni Yakobe na munyakeso uyo zina lake ni Simone. Ŵapositole ŵaŵiri ŵakucemeka Yuda. Yumoza ni Yuda Isikariyote, ndipo munyake ni Yuda uyo wakucemekaso Tadeyu. Paliso Filipu na Nataniyele (wakucemekaso Bartolomeyu), na Mateyu na Tomasi.

Wati wawerako ku Samariya, Yesu wakamba kupharazga kwa nyengo yakwamba kuti: ‘Ufumu wakucanya waneng’enera.’ Kasi ufumu uwu ukuwumanya? Ni boma leneco la Ciuta. Yesu ndiyo fumu yake. Wazamuwusa kufuma kucanya na kwiziska mtende pa caru capasi. Ufumu wa Ciuta uzamuzgora caru cose capasi kuŵa paradiso wakutowa.

Apa Yesu wakusambizga ŵanthu za ufumu wa Ciuta. Wakulongosora kuti: ‘Para mukulomba mutenge, Ŵadada ŵithu ŵakucanya, zina linu litumbikike. Ufumu winu wize. Khumbo linu licitike pano pasi nga nkhucanya.’ Ŵanthu ŵanandi ŵakucema lurombo lwa ciyelezgero ili kuti ‘Lurombo lwa Fumu.’ Ŵanyake ŵakulicema kuti lurombo lwa ‘Ŵadada Ŵithu.’ Kasi ungayowoya lurombo lose?

Yesu wakasambizgaso ŵanthu umo ŵakwenera kucitirana vinthu yumoza na munyake. Wakati: ‘Vyose ivyo mukukhumba kuti ŵanyinu ŵamucitirani, vyeneivyo namwe muŵacitirenge.’ Kasi ukukondwa yayi para ŵanyako ŵakukucitira vinthu mwalusungu? Ntheura, Yesu wakuti tikwenera kucitira ŵanyithu vinthu mwalusungu. Kasi cizamuŵa cinthu cakukondweska yayi peneapo waliyose wazamucita ici mu paradiso?