Tantara 91

Jesosy Nampianatra Tan̈abon’ny Bongo

HITANAO Jesosy mipetraka io? Tan̈abon’ny bongo ta Galilia izy iziô, mampianatra olo jiaby io. Mpianatranany mipetraka marikitry izy io. Nisy 12 lahy tiô nifidiny boaka tamin’olo aby io, nataony apostoly. Apostoly zen̈y, mpianatra Jesosy ten̈a marikitry izy. Hainao azôvy aby an̈aran-drô io?

Simona Petera ndreky Andrea rahalahiny. Baka iô, Jakoba ndreky Jaona mpirahalahy. Nisy koa mpianatranany hafa, Jakoba ndreky Simona an̈aran-drô. Nisy Jodasy aroe koa: Jodasy Iskariota ndreky Jodasy Tadeo. Filipo ndreky Natanaela (na Bartolomeo), aviô Matio ndreky Tomasy.

Jesosy koa fa nimpody ta Samaria, nanampôno nitory. Volan̈iny: ‘Fanjakan̈an’ny lan̈itry efa marikitry.’ Hainao ino fanjakan̈a io? Izio fitondrasan̈an’ny Zan̈ahary. Jesosy ampanjaka amy fanjakan̈a io. An-dan̈itry an̈y, izy hitaondra fiadan̈ana ambony tany ty. Amy leran’izen̈y, fanjakan̈an’ny Zan̈ahary io han̈ano tany jiaby ty paradisa.

Jesosy iziô mampianatra olo aby io maomba fanjakan̈a io. Volan̈iny: ‘Kara’ty edy ataonarô lera mivavaka. Anao Babanay an-dan̈itry ao, hankamasin̈iny an̈aranao. Irarian̈a ho avy fanjakan̈anao. Irarian̈a sitrapônao amy tany ty ho tanteraka, miran̈a an-dan̈itry an̈y.’ Maro olo mivolan̈a izio ‘Vavaka nampianarin’ny Tômpo’ na ‘Rainay izay any an-danitra.’ Hainao vavaka io rango am-boanalohany zisk’amy farany?

Jesosy nampianatra olo toetry ilain̈y amy fiaraha-monin̈y. Volan̈iny: ‘Zay raha tianarô ataon’olo aminarô, karaha zen̈y koa ataova amin-drô.’ Tianao tsara fan̈ahy aminao olo jiaby? Jesosy nivolan̈a fa atsika koa mila tsara fan̈ahy amin’olo. Misaora tsara paradisa zen̈y, fôtony olo jiaby tsara fan̈ahy aby!

Matio toko faha-5 ziska toko faha-7; 10:1-4.