AMLOLE Yesu jwatemi pelepaju. Akwajiganya ŵandu wosopeŵa petumbi ku Galilaya. Ŵatemi ciŵandika jwalakwejo ali ŵakumkuya ŵakwe. Asagwile ŵandu ŵakwana 12 kuti aŵe ŵandumetume ŵakwe. Ŵandumetume ali ŵakumkuya ŵa Yesu ŵapajika. Ana akugamanyilila mena gawo?

Pa ŵandumetumeŵa apali Simoni Petulo ni mpwakwe Andileya. Soni pana Yakobo ni Yohane, ŵalisoni ŵapaulongo. Ndumetume jwine lina lyakwe lilisoni Yakobo, soni jwine lina lyakwe lilisoni Simoni. Ŵandumetume ŵane ŵaŵili akwetesoni mena gakulandana gakuti Yudasi. Jwineju ali Yudasi Isikaliyoti, Yudasi jwinejo akusamkolangasoni kuŵa Tadayo. Apalisoni Filipo ni Nataniyele (jwakusakolanjikwasoni kuti Batolomayo), ŵandumetume ŵane ali Matayo ni Tomasi.

Panyuma pakuwuja ku Samaliya, Yesu ŵatandite kulalicila kandanda acitiji: ‘Ucimwene wakwinani uŵandicile.’ Ana akuwumanyilila ucimwenewu? Jili boma jisyesyene ja Mlungu. Mwenye jwakwe ali Yesu. Jwalakwe cacilamulilaga ali kwinani, soni caciyikasya mtunjelele pacilambo capasi. Ucimwene wa Mlungu ucitendekasya cilambo capasi cosope kuŵa paladaiso jwakusalala.

Yesu apano akwajiganya ŵandu ya ucimwene. Jwalakwe akutagulila kuti: ‘Pamkupopela mjileje kuti, Atati ŵetu ŵakwinani, lina lyawo licimbicikwe. Ucimwene wawo uyice. Lisosa lyawo litendekwe pacilambo capasi, mpela mwayiŵelele kwinani.’ Ŵajinji akusalikolanga lipopeloli kuŵa ‘Lipopelo lya Ambuje.’ Ŵane akusalikolangaga kuti lipopelo lya ‘Atati ŵetu.’ Ana wawojo mpaka akombole kusala lipopelo lyosope?

Yesu akwajiganyasoni ŵandu utame wambone ni acimjawo. Jwalakwe akuŵeceta kuti: ‘Mwatendeleje ŵane yamkusaka kuti nomwe amtendeleje.’ Ana wawojo ŵangasangalala naga ŵane akwalosya ndamo syambone? M’yoyo Yesu akuŵeceta kuti tukusosekwa kwatendelaga ŵane yindu yambone. Ana yindu ngasiyiŵa yakusangalasya pacilambo capasi pandaŵi jele mundu jwalijose cacitendaga yeleyi?