Maana 92nan

Yesu ye suw lakunun

I ƝƐ bɛ dennin min na yan, a si ye san 12 ye. Yesu de bɛ ka a bolo minɛ. A ba ni a fa de jɔlen bɛ a kɛrɛfɛ. Yala i b’a dɔn mun na u nisɔndiyalen bɛ nin cogo la wa? An ka o lajɛ ɲɔgɔn fɛ.

Dennin fa ye mɔgɔba dɔ de ye min tɔgɔ ye ko Jayirus. A denmuso banana don dɔ la, ka da. Nka, a tun tɛ ka kɛnɛya. A ka bana tun bɛ ka juguya ka taa a fɛ. Jayirus ni a muso jɔrɔla kosɛbɛ, bawo a kɛra  i ko u denmuso tun bɛna sa. Den kelenpe min tun bɛ u bolo, o tun ye o dennin ye. O kosɔn a taara Yesu ɲini bawo Yesu ye kabako minnu kɛ, Jayirus tun ye olu komɛn.

Jayirus ye Yesu ye tuma min na, jamaba tun kɛlen bɛ ka a koori. Nka Jayirus tɛmɛna jama cɛ la, k’i bin Yesu senkɔrɔ, k’a deli ko: ‘Ne denmuso bananenba don. Ne b’i deli, na, i ka a kɛnɛya.’ Yesu y’a fɔ Jayirus ye ko a bɛ na.

Ikomi u tun bɛ ka taama ɲɔgɔn fɛ ka taa, mɔgɔw tun bɛ ka ɲɔgɔn digi walisa ka gɛrɛ Yesu la kosɛbɛ. Nka, Yesu sinna k’a jɔ yɔrɔnin kelen, ka ɲininkali kɛ ko: ‘Jɔn de magara ne la?’ Yesu y’a ye ko fanga dɔ bɔra ale la. O kosɔn a y’a dɔn ko mɔgɔ dɔ magara a la. Nka, jɔni tun don? Muso dɔ don min tun man kɛnɛ kabini san 12. A magara Yesu ka fini la dɔrɔn, a kɛnɛyara.

O ko ye Jayirus hakili sigi kosɛbɛ, bawo a y’a ye ko a ka nɔgɔn Yesu bolo ka mɔgɔ kɛnɛya. Nka, mɔgɔ dɔ cira ka na a fɔ Jayirus ye ko: ‘I kana Yesu tɔɔrɔ tun. I denmuso sara.’ Yesu ye o mɛn tuma min na, a ko Jayirus ma: ‘I kana jɔrɔ, a bɛna kɛnɛya.’

U sera tuma min na Jayirus ka so, mɔgɔw tun bɛ ka kule dusukasi bolo. Nka Yesu ko: ‘Aw kana kasi. Den ma sa, a bɛ sunɔgɔ dɔrɔn de la.’ Nka mɔgɔw yɛlɛla Yesu ma. U y’u ɲagaribɔ a la. U tun b’a dɔn ko den sara.

O kɔfɛ, den tun dalen bɛ yɔrɔ min na, Yesu ye den fa ni a ba ani a ka ciden saba ladon a nɔfɛ o yɔrɔ la. Yesu ye den bolo minɛ k’a fɔ ko: ‘I wuli!’ O yɔrɔnin bɛɛ la, den seginna ɲɛnamaya la, i ko i ɲɛ b’a la cogo min na yan. Den wulila ka taama. O ko de ye dennin fa ni a ba nisɔndiya kosɛbɛ nin cogo la.

Nka, nin dennin ma kɛ Yesu ka mɔgɔ fɔlɔ lakununnen ye. Bibulu bɛ kuma mɔgɔ fɔlɔ min kan, o ye muso cɛsalen dɔ denkɛ ye, Nayin dugu kɔnɔ. Kɔfɛ, Yesu ye Lazare fana lakunun. Lazare tun ye Mariyama ni Marti balimakɛ ye. Yesu bɛna mara kɛ tuma min na i n’a fɔ Ala ka masakɛ, a bɛna su caman-caman lana ɲɛnamaya la. Yala o ko tɛ an nisɔndiya wa?

Luka 8:​40-56; 7:​11-17; Yuhana 11:​17-44.