HIKA i nan hmuh mi ngakchianu cu kum 12 a si. Jesuh nih a kut in a tlaih i, a nu le a pa cu a pawng ah an dir ko. Zeicah annih cu aa lawm ngai mi an lawh? zoh tuah u sih.

Ngakchianute a pa cu Jairu an ti mi upa pakhat a si. Ni khat cu a fanute cu a zaw i, ihkhun cung ah an ihter. Sihmanhsehlaw tlawmpal hmanh a dam deuh hrim lo. A zawtnak cu a zual chin lengmang. Ngakchianute cu a thih hnik cang caah Jairu le a nupi cu an thin a phang ngaingai. Amah cu an fanu ngeihchunte a si. Cucaah Jairu cu Jesuh kawh awk ah a kal. Jesuh nih khuaruahhar thil tampi a tuah mi hna kong kha a theih caah a si.

Jairu nih Jesuh cu a hmuh tik ah, amah cu mibu nganpi nih an rak kulh ko. Sihmanhsehlaw Jairu nih mibu lak ahcun aa tenh i Jesuh ke hram ah a bawk. ‘Ka fanu cu a zaw i a zual ko. Zangfahnak in ra law ra damter ko tuah,’ tiah Jesuh kha a nawl. Jesuh nih ka ra ko lai tiah a ti.

An kal lio ah khan, mibupi nihcun an hun naih deuh ve. Chikkhatte ah Jesuh cu a dir i: ‘Ahodah a ka tong?’ tiah a hal hna. A chung in ṭhawnnak a chuah kha a hngalh caah pakhat khat nih an ka tongh ko ti kha a hngalh. Aho dah a si? Kum 12 chung a rak zaw cang mi nu pakhat a si. Amah cu a ra i, Jesuh thil kha a tongh i a dam colh ko!

Jairu nih mah cu a hmuh caah Jesuh caah mi pakhat damter cu zeitluk fawi mi thil dah a si ti kha a hngalh i a hna a ngam ngai. Sihmanhsehlaw mah liote ahcun zualko pakhat a ra i, ‘Jesuh kha hna hnawh len ti hlah. Na fanu cu a thi cang,’ tiah Jairu kha a hun chimh. Cu bia cu Jesuh nih a theih i: ‘Na thin phang hlah, a dam te ko lai,’ tiah Jairu kha a ti.

A donghnak ah Jairu a inn a phanh tik ah, mi hna cu ngaihchiatnak he an rak ṭap len ko. Sihmanhsehlaw Jesuh nih: ‘Ṭap hlah u. Ngakchianu cu a thi lo. Aa hngilh pei a si ko cu,’ a ti hna. Sihmanhsehlaw a thi ko ti kha an hngalh caah an ni i, Jesuh kha an nihsawh.

Cutikah Jesuh nih ngakchianu a pa le a nu le a lamkaltu pathum hna cu ngakchianu ihnak khaan chung ah a luhpi hna. A kut in a vun tliah i: ‘Tho tuah!’ a ti. Cun hika i nan hmuh bang hin ngakchianu cu a nung ṭhan. Cun a tho i a kal! Cu ruang ah a pa le a nu cu an i lawmh ngaingai mi a si.

Amah cu Jesuh nih thihnak in a thawhter hmasa bik mi a si lo. A hmasa bik mi Baibal nih a chim mi cu Nain khua i nuhmeinu fapa a si. A hnu ah Mari le Martha an ṭapa Lazaruh zong kha Jesuh nih a thawhter ṭhan ve. Pathian thim mi siangpahrang in Jesuh nih a uk tik ahcun mithi tampi kha a nunter ṭhan te hna lai. Cucu kan i lawmh awk a si hnga lo maw?