SA PTI fiy ki ou vwar la i annan 12 an. Zezi pe atrap son lanmen, e son manman ek son papa pe debout lanmenm la obor. Eski ou konnen akoz ki zot vreman kontan? Annou vwar.

Papa sa pti fiy ti en zonm enportan, i ti apel Zairis. En zour son pti fiy ti tonm malad, e zot ti met li lo lili. Me i pa ti vin byen. I ti malad plis ankor. Zairis ek son madanm ti enkyet en kantite, akoz i paret ki zot pti fiy ti pe al mor. I ti sel fiy ki zot ti annan. Alor Zairis ti al sers Zezi. I ti’n antann sa bann mirak ki Zezi ti’n fer.

Kan Zairis ti trouv Zezi, ti annan en gran lafoul dimoun otour li. Me Zairis ti antre dan lafoul e i ti tonm ater obor lipye Zezi. ‘Mon pti fiy i byen, byen malad,’ i ti dir. ‘Silvouple, vin geri li,’ i ti sipliye. Zezi ti dir ki i pou vini.

Pandan ki zot ti pe ale, lafoul ti kontinyen pouse pour apros pli pre. Toudenkou, Zezi ti arete. ‘Lekel ki’n tous mwan?’ i ti demande. Zezi ti santi ki en lafors ti’n sorti avek li, alor i ti konnen ki ti annan en dimoun ki ti’n tous li. Me lekel? Ti en madanm ki ti annan en maladi grav pour 12 an. I ti zis tous lenz Zezi, e i ti geri!

Sa ti fer Zairis santi li pli byen, akoz i ti kapab vwar konman i ti fasil pour Zezi geri en dimoun. Me apre sa en mesaze ti vini. ‘Pa fatig Zezi plis ki sa,’ i ti dir avek Zairis. ‘Ou pti fiy in mor.’ Zezi ti antann sa konversasyon e i ti dir avek Zairis: ‘Pa bezwen enkyet, ou pti fiy pou byen.’

Finalman zot ti ariv kot lakaz Zairis, bann dimoun ti pe plere akoz zot ti vreman sagren. Me Zezi ti dir: ‘Pa bezwen plere. Sa pti fiy pa ankor mor. I pe dormi.’ Me zot ti riye e zot ti sikann Zezi, akoz zot ti konnen ki sa pti fiy ti’n mor.

Apre sa Zezi ti pran papa ek manman sa pti fiy ek trwa son bann zapot e zot ti al dan lasanm kot sa pti fiy ti pe alonze. Zezi ti atrap son lanmen e i ti dir: ‘Leve!’ E sa pti fiy ti leve, zis parey ou kapab vwar dan sa portre. I ti leve e i ti konmans marse! Se pour sa rezon ki son manman ek son papa ti vreman kontan.

Sa pa ti premye dimoun ki Zezi ti resisite. Labib i dir nou ki premye dimoun ki Zezi ti resisite ti garson en madanm ki ti’n perdi son msye, sa madanm ti reste dan lavil Nain. Plitar, Zezi ti osi resisit Lazar, frer Mari ek Mart. Kan Zezi pou dirize konman lerwa, i pou resisit en kantite, kantite dimoun. Eski pa nou kontan ki Zezi pou fer sa?