BUNOLO weg be daggedi 12 años nigga. Jesús argangi ganigwissi, geb e nan, e bab bogwa walig gwismarmoga. ¿Be wisi ibigala yeeriddomala? Anmar daggoena.

Bunolo bab nuga Jairo, dule dummadi. Ibagwengi e bunolo ueleali, geb camag na mesismala. Auggine gwen nugusuli; agga bur bule ueleali. Jairo e omebo nue buggib binsamala, ar daglegua bunolo burgodaglege. We bunolo, e bunolo wargwennagwad gue. Degsoggu Jairo, Jesús aminadsunna. Jairo iddodii, Jesús ibmar dagledisulid nabir imagye.

Jairo, Jesús amidabgua dulemar buggib Jesús ebiris buggwa dagnoniggi. Auggine Jairo dulemar inbabali dogedoge nade, geb Jesús asabinni sindigar signoniggi. Geb sogde: ‘An bunolo nue geggusmai. Wis be anba dage, anga wis be an mimmi nudagdage’, Jesúsgi nai guali. Jesús soge naoye.

Degi nadabmaladgi, dulemar na barmeddenanaid, Jesúsgi waligga gubiedba. Geb Jesús uggiagwar boo gwisgunoniggi, geb egissali: ‘¿Doa an ebusa?’. Jesús wisi dule e ebusa, ar iddosa e gine gangued nosa. Auggine, ¿doa Jesús ebussunna? Daggargu ome 12 años gusa boni nigga gudiidi. ¡We ome noniggi, Jesús mor ebusa, geb degiidgi, nugusa!

Emisgi Jairo bur nued iddonade, ar dagsa soggu Jesúsga ibigwensuli emar nudagged. Auggine, emisgi dule wargwen Jairog sognoniggi: ‘Mer bar Jesúsgi alamagnague. Be bunolo burgwisa’. Jesús iddosa geb Jairog sogde: ‘Mer bai iddogo; be bunolo aggar guosulid’.

Jairo negse owarmagdabmargua, dulemar nue wileiddo bobugmala. Auggine Jesús soge: ‘Mer bomala. Bunolo burgwissulid. Binsa unnila gammaid’. Agga dulemar Jesúsga alliarmala geb egi dodoarmala, ar emar dina wisi bunolo burgwarmai.

Degiidgi, Jesús, bunolo e baba geb e nana, degine, Jesús apóstolmar warbaagwa, bunolo maid cuarto yabali dogsamala. Geb Jesús, bunolo gasa argangi, geb ega soge: ‘¡Gwisgue!’. Geb bunolo gannar durgusa, igi weg be dagge. ¡Gwisgusa geb ganna ganna nade! Agala e bab geb e nana yeeriddomala.

Jesús we dule insogi odulossuli. Dule gebe odulolesadi, adi ome sui burgwisad e massi, neggwebur Naín nugad ginedi. Sorba, Jesús, Lázaro odulosbali, we duledi María e susu geb Marta e susu. Babdummad, reyg Jesús imasale, Jesús, dule buggib gannar odulogoe. ¿We yeeriddo anmar imaggedsur be binsae?