INISENIAI oi itaia kekenina ena mauri lagani be 12. Iesu ese ena imana ia dogoatao noho, bona ena sinana bona tamana be ia kahirakahira idia gini. Idia moale ena badina oi diba, a? Mani ita itaia.

Kekeni ena tamana be tau badana ta ladana Iairo. Dina ta ena natuna kekeni ia gorere, bona bedi ai idia hahekurea. To ia namo lasi. Ena gorere ia bada ia lao. Iairo bona ena adavana idia lalo-hekwarahi bada, badina toana be edia natuna kekeni maragina do ia mase. Ia be edia natuna tamona sibona. Unai dainai Iairo ia lao Iesu ia tahua totona. Iesu ese ia karaia hoa karadia edia sivarai ia kamonai vadaeni.

Iairo ese Iesu ia davaria neganai, taunimanima hutuma ese ia idia gegea. To Iairo be edia huanai ia raka lao bona Iesu ena aena badinai ia tui diho. Ia gwau: ‘Egu natuna kekeni ia gorere bada herea.’ Ia noinoi, ‘Mani oi mai bona oi hanamoa.’ Iesu ia gwau do ia lao.

Idia raka lao noho lalonai, hutuma be idia doria heheni Iesu kahirakahira idia lao totona. Vadaeni Iesu ia gini. Ia henanadai: ‘Daika ese lau ia dogoatao?’ Iesu ia mamia siahu haida be ia amo ia raka-lasi, unai dainai ia diba ta ese ia dogoatao. To daika ese? Ia be lagani 12 lalonai ia gorere hahinena ta. Ia mai bona Iesu ena dabua ia dogoatao, bena ia namo!

Unai ese Iairo ena hemami ia hanamoa, badina ia itaia diba Iesu ese taunimanima ia hanamoa haraga diba. Bena gwaukau tauna ta ia mai. Iairo ia hamaoroa: ‘Iesu dekenai hekwarahi oi henia lasi. Emu natuna kekeni be ia mase vadaeni.’ Iesu ese unai ia kamonai bona Iairo dekenai ia gwau: ‘Oi laloa momo lasi, do ia namo.’

Iairo ena ruma dekenai idia ginidae neganai, taunimanima idia taitai mai lalohisihisi bada danu. To Iesu ia gwau: ‘Umui taitai lasi. Kekeni be ia mase lasi. Ia be ia mahuta sibona.’ To idia kiri bona Iesu idia hevasehalaia, badina idia diba kekeni be ia mase vadaeni.

Bena Iesu ese kekeni ena tamana bona sinana bona ena aposetolo taudia toi be kekeni ia hekure noho daiutuna lalonai ia hakaudia vareai. Kekeni ena imana ia abia bona ia gwau: ‘Oi toreisi!’ Bona ia mauri lou, inai laulau dekenai oi itaia bamona. Bona ia toreisi bona ia raka loaloa! Unai dainai ena tamana bona sinana idia moale bada herea.

To unai be Iesu ese ia hatorea isi lou tauna ginigunana lasi. Baibel ese ia gwauraia tauna ginigunana be Naina hanuana dekenai ia noho vabu ta ena natuna. Gabeai, Iesu ese Maria bona Mareta edia taihuna Lasaro danu be mase amo ia hatorea isi lou. Iesu be Dirava ena king bamona do ia lohia neganai, ia ese mase taudia momo herea do ia hamauridia lou. Unai dainai ita moale diba, ani?