ISTWA 92
Jezi resisite mò
TIFI nou wè la a gen 12 an. Jezi kenbe men l. Se manman l ak papa l ki kanpe toupre a. Èske w konnen sa k fè yo kontan konsa ? Ann al gade pou n wè.
Papa tifi a se yon moun enpòtan ki rele Jayiris. Yon jou, pitit fi li a vin malad. Yo mete l kouche, men li pa amelyore. Okontrè se pi mal li vin pi mal. Sa enkyete Jayiris ak madanm li anpil, paske pou jan yo wè pitit la, sanble pa ret anyen pou l mouri. Se yon sèl pitit fi a yo genyen. Lè Jayiris wè sa, l al chèche Jezi. Li tande pale de mirak Jezi ap fè yo.
Lè Jayiris jwenn Jezi, li wè yon gwo foul moun ki antoure l. Men, Jayiris antre nan foul la, li met ajenou nan pye Jezi. Li di l : ‘ Se pa ti malad pitit fi m nan malad. Tanpri, vin geri l pou mwen. ’ Jezi di l ap vini.
Pandan yo prale, foul la pa lage Jezi yon may. Bridsoukou Jezi kanpe. Li di : ‘ Kiyès ki manyen m nan ? ’ Jezi santi gen yon fòs ki sot nan li. Li konnen gen yon moun ki manyen l. Men, se kiyès ? Se yon madanm ki gen 12 an depi li malad anpil. Li vin manyen rad Jezi epi li geri menm kote a !
Sa te fè Jayiris gen plis konfyans. Li wè jan li fasil pou Jezi geri moun. Men, gen yon mesaje ki vini. Li di Jayiris konsa : ‘ Pa deranje Jezi plis pase sa. Pitit ou a mouri. ’ Jezi gentan tande sa, li di Jayiris : ‘ Pa enkyete w, pitit ou a ap anfòm. ’
Finalman, lè yo rive kay Jayiris, yo jwenn moun yo ap rele, yo nan gwo lapenn. Men Jezi di yo konsa : ‘ Pa kriye, timoun nan pa mouri, se sèlman dòmi l ap dòmi. ’ Men, yo tonbe ri Jezi e yo tonbe pase l nan jwèt, paske yo byen konnen se mouri timoun nan mouri.
Kounye a, Jezi pran papa a, manman an ak twa nan apot li yo, li antre nan chanm kote timoun nan kouche a avèk yo. Li pran men timoun nan, li di : ‘ Leve ! ’ Epi timoun nan reviv tankou jan w ap gade l la a. Li leve, li pran mache ! Se sa k fè manman l ak papa l kontan anpil konsa a.
Se pa premye moun Jezi te resisite. Dapre Bib la, premye moun Jezi resisite, se pitit gason yon vèv k ap viv nan vil Nayin. Apre sa, Jezi resisite yon frè Mari ak Mat ki rele Laza. Lè Jezi ap gouvène kòm wa, li pral resisite anpil anpil mò. Èske sa pa fè kè nou kontan ?
Lòt sijè ki enteresan
JEZI SE CHEMEN AN, VERITE A, LAVI A
Yon tifi retounen ap viv ankò!
Moun yo pase Jezi nan rizib lè Jezi di tifi ki mouri a se jis dòmi l ap dòmi. Ki sa Jezi te konnen yo pa t konnen?
JEZI SE CHEMEN AN, VERITE A, LAVI A
Jezi resisite pitit gason yon vèv
Moun ki te wè mirak sa a t ap chèche konnen sa mirak sa a vle di toutbon.
JEZI SE CHEMEN AN, VERITE A, LAVI A
Laza resisite
Gen de bagay nan evènman sa a ki fè li enposib pou menm moun ki te opoze ak Jezi yo nye mirak la.
